U Aung Taan Cu Hluttaw Vice Chairman A Sinak Rian In Aa Din Cang Lai; Pu Zo Bawi
Salai Elvis+Tawk Tling Thang| 2019 February 26| Chin ramkulh hluttaw vice chairman U Aung Taan nih vice chairman a sinak riandinhnak ca cu tu thla chung ah a tial cang lai tiah Chin ramkulh hluttaw zung in thawng kan theih.
Central NLD party in Vice Chairman-2 Dr. Zaw Myint Maung minthut in ralrin peknak ca an thlahmi ah hitihin aa tial.
2019 February 7, central NLD party chungtel a simi U Nyan Win, U Han Tha Mint, U Tun Tun Hein, Dr. Myo Nyunt, Dr. Daw May Win Myint, Dr. Myint Naing le Dr. Zaw Myint Maung, Chin ramkulh Chief Minister, Chin ramkulh hluttaw Speaker hmai ah keimah pumpak in Chin ramkulh hluttaw speaker changtu (Vice Chairman) rian in keimah lungthote in kaa din lai tiah bia aa kam. Asinain, nihin tiang rian i dinh lo in leave (khunh) in aa din timi theih a si caah a biakam ning in a hnubik 2019 February 23 ah Chin ramkulh hluttaw Vice Chairman rian in i dinh ding le aa dinh lo ahcun hluttaw chung ah sualphawt in dinhter (impeachment) a si lai tiah aa tial.
Hi kong he pehtlai in February 26 chun ah Chin ramkulh hluttaw Speaker Pu Zo Bawi cu The Chinland Post nih pehtlaihnak kan tuah i atu bantuk in a chim.
“Cunglei party upa nih rian dinhnak kong ca an pekmi kha a dik ko. Party upa hna sin ah rian dinhnak ca ka tial lai tiah a ti tak ko. Amahbelte, cunglei NLD upa nih dinhnak ca rak tial ti tu cu an ti lo. Rian dinhnak ca ka tial lai a timi zong hi MP sinak si lo in hluttaw Vice Chairman sinak te lawng a si. Zeitik ah dah riandinhnak ca a tial lai timi cu kan thei rih lo. Asinain tu thla dih hlan ah a tial theu ko lai. Hluttaw Vice Chairman zaka a lawng dingmi kong ah mi zeidah rianpek a si te lai ti zong atu tiang ahcun zeihmanh ruahcia chungmi kan ngei rih lo. Zeiruang bik ah dah aa dinh lai ti cu ka thei bak lo”.
NLD party lutlai Dr. Zaw Myint Maung minthut in MP U Aung Taan ralrin peknak cabia cung ah Mindat Zatlang Mibu nih February 24 ah dohkalhnak cathanh an chuah.
U Aung Taan a palhnak, a sualnak, a rian tlamtlinh lonak kong an langhter chih lo. Cu batuk a tuah a si hmanh ah ramkulh cozah, ramkulh hluttaw nih rian dinhnak kong cu an tawlrel awk a si. Cuti si lo in central NLD party nih i sawhkalh in tlaihrenghnak a tuah le rampi suttung a simi uknak le upadi sernak suttung zeirello thlanglamhnak a tuah a si. Mizapi nih thimmi hluttaw palai hi mee petu mizapi lungput pin ah ramkulh cozah le hluttaw nih riandinhter si lo in NLD party nih hluttaw Vice Chairman rian in dinhternak ding an tawlrelmi cu Mindat zatlang mibu nih fakpi in kan dolhkalh tiah cathanh ahcun an langhter.
Hi kong he pehtlai in U Aung Taan cu The Chinland Post nih pehtlaihnak kan tuah nain a kan let duh lo. Motor ka mongh lio a si a kan tei chel, khual ka tlawn lio a si, chawnh awk ka tha rih lo ti phun in a kan leh peng.
U Aung Taan a rian in i dinhnak kong he pehtlai in Mindat NLD chung buainak pakhat khat ruang le i reportnak ruang ah a si kho. NLD zong ah party chung buainak pawl a um tiah U Aung Taan he aa naihniammi pakhat nih The Chinland Post ah a chim.
1990 kum in U Aung Taan hi Mindat peng NLD ah thazaang dihlak in aa tel i mizapi nih an uar ngaimi le tha an pek ngaimi a si. Asinain, 2015 thimnak Mindat peng MP aa cuh ding thimnak ah NLD in aa cuh ding U Ling Naing cu cuhter duh than lo in amah fanu pasal a simi U Nay Lin Aung (Kawl miphun) tu a cuh than. Cu bantuk tete in party chung buainak tete a um len” tiah Mindat mino pakhat nih The Chinland Post ah a chim.
February thla chung Chin ramkulh hluttaw lakhruak tonpumhnak tuah lai nikhat aa duh ah hluttaw Speaker Pu Zo Bawi nih hluttaw Yeya committee meeting ah U Aung Taan a rian in aa din lai tiah a rak chim.
U Aung Taan hi Chin hluttaw Speaker chang (Vice Chairman) lawng si lo in Chin ramkulh NLD party i thithruainak ah Secretary zong a si chih tiah kan theih.
About The Author
