Pu Zo Bawi; U Aung Taan Zaka Deputy Speaker Cu Cunglei Ah Min Cazin Kan Pek Cang
Tawk Tling Thang| 2019 April 1| Chin ramkulh hluttaw palai U Aung Taan cu Deputy Speaker rian in aa phuah cang caah amah airawltu ding palai min cazin zong cunglei ah an pek cang tiah kan theih.
Hi kong he pehtlai in Chin ramkulh hluttaw Speaker Pu Zo Bawi nih, “Hluttaw palai U Aung Taan nih March 25 ah Deputy Speaker sinak in rian dinhnak ca hluttaw ah a chiah. Hluttaw nih March 28 ah a kong kan ceihpiak i dinhnak ca a hal bantuk te in kan cohlan. Cucaah, MP U Aung Taan cu deputy speaker rian in aa din cang i MP sawhsawh lawng a si cang lai. Amah hmunhma airawltu ding min cazin zong cunglei ah ca kan chiah cang. A ruah hlan ah ca an kan leh colh ko lai. Ca an kan leh bak in hlluttaw meeting kan auh lai i fehternak kan tuah colh ko lai” tiah The Chinland Post ah a chim.
U Aung Taan nih deputy speaker sinak in rian dinhnak ca a tialmi ah a ruang a langhter lo, na kan dinhter naklai tiah nawlnak in a tial. Central NLD party in Vice Chairman-2 Dr. Zaw Myint Maung minthut in party nih 2019 February thla ahkhan rian dinhnak ca na tial lai tiah ralrinnak ca an rak pek. Cu lio ah a hnu bik February 23 ah na tial lai an rak ti nain March 25 ceo ah dinhnak ca cu a tial taktak tiah theih a si.
NLD cozah kai hnu ah Chin ramkulh cozah bu chung ah Electric le Sipin minister hlun Salai Issac Khen zong minister rian in a rak i din bal cang.
Ahodah Chin ramkulh Deputy Speaker rian a tuan lai timi hi Speaker nih siseh, party zong nih an chim duh rih lo. Mindat, Kanpetlet lei minung thim an si ahcun Kanpetlet in MP Pu Phwe Aa a si kho men tiah MP cheukhat nih an ruahdamh.
1990 kum in U Aung Taan hi Mindat peng NLD ah thazaang dihlak in aa tel i mizapi nih an uar ngaimi le tha an pek ngaimi le 2015 thimnak ah Mindat peng in MP a tlingmi a si. Cu pin ah atu lio Chin ramkulh NLD party i thithruainak ah Secretary zong a si chih tiah kan theih.
“U Aung Taan hi 2015 thimnak Mindat peng MP aa cuh ding thimnak ah NLD in aa cuh ding U Ling Naing cu cuhter duh than lo in amah fanu pasal a simi U Nay Lin Aung (Kawl miphun) tu a cuhter. Cu bantuk tete in party chung buainak tete a ngeih ruang ah central NLD party nih riandinhnak ca na tial lai i atu bantuk in ca a tialnak hi a si” tiah Mindat mino pakhat nih The Chinland Post ah a chim.
Chin ramkulh hluttaw ah mizapi nih thimmi palai 18 le ralkap palai in minung 6, an zapi 24 an si. Hi chung ah nu pakhat hmanh an i tel lo.
About The Author
