U Jimmy le U Phyo Zeya Thaw telh in minung 4 cu an sualnak an in cang tiah SAC nih a thanh
The Chinland Post | 2022 July 25 – Burma miphun nih an i bochan tuk mi 88 siahngakchia hruaitu a simi U Kyaw Min Yu @ U Jimmy, NLD hluttaw palai hlun a simi U Zeya Thaw, mipi 2 a simi U Hla Myo Aung le U Aung Tu Ya Zaw minung 4 hna cu an sualnak an in cang tiah SAC nih July 25 ah a thanh.
Zeitik ni le caan ah dah sual internak an tuah timi cu a fiang in langhter a si lo.
A luancia July 3 ah sualphawt an simi kha a tak in kan tuah cang lai tiah SAC biachimnak nawl a ngeitu Major-General Zaw Min Htun nih media sin ah a chim hnu thla 1 a rauh hnuah an chungkhar pawl he online in tonternak an ngeih dih hna hnuah atu bantuk in an thanh hi a si.
Hriam he tlaih an si timi le a kai tharmi cozah an doh timi sualphawtnak in SAC nih pohhma ၄၉(က), ၅၀(ဈ), ၅၀(ည) in U Jimmy le U Phyo Zeya Taw cu bia an rak ceih hna. January 21 ah Death Penalty (သေဒဏ်) an rak pek hna.
U Phyo Zeya Thaw le U Jimmy hi an tlaih hna thok in baceihnak zung ah sihni auhnak nawl an ngeih lo leng ah zalong tein i khamhnak nawl zong an rak ngei lo.
Anmah pawl Death Penalty (သေဒဏ်) kan pek hna lai tiah SAC nih a thanh bak in vawlei pumpi nuhrin covo phu pawl le UN phu pawl nih duhlonak cathanh an rak langhter.
Myanmar ram ah Death Penalty (သေဒဏ်) pek a ngah ko nain ramkhel he aa pehtlai mi minung le siahngakchia hruaitu pawl hri an awhter tak hna hi a um lonak kum 40 leng a si cang.
About The Author
