U Nyan Win; Phunghrampi Remh Kan Duhmi Hi Tatmadaw Thlak Kan Duh Ruang Ah A Si Lo

City Hunter| 2018 June 25| NLD (National League for Democracy) nih 2008 phunghramhpi remh kan duhmi hi Tatmadaw thlak kan duh ruang ah si lo in democracy a tuanchuah kho dingmi phunghrampi siter kan duh ruang ah a si tiah NLD CEC in Secretary chungtel U Nyan Win nih June 24 thawngfianternak ah a chim.

“Tatmadaw lei nih anmah kong tampi aa tel caah phunghrampi kan kilven lai an ti. Kannih nihcun phunghrampi hi democracy tuanchuahnak caah remh kan duh. Tatmadaw caah remh kan timhmi a si lo, Tatmadaw thlaknak ca zong ah a si lo. Amahbelte mizapi caah phunghrampi cu remh hrimhrim a haumi a si” tiah U Nyan Win nihcun a chim.

Phunghrampi remh hi NLD nih a biapi in thimnak tuah lio i biakamnak an tuahmi a si. Asinain thimnak i teinak an hmu hnu kum 2 renglo tiang ah phunghram remhnak ding an i zuamnak tha a der tuk tiah soiselnak a chuak.

“Phunghrampi remh ding hi kan thu in kan zoh sawhsawh lo. A si khawh chung in kan i zuam ko. Phunghrampi upadi tlamtlingte in kan remh khawh hlan chung paoh hi policy cu fekte in kan i tlaih peng lai” tiah U Nyan Win nih a chim.

Phunghrampi remh kan i zuamnak ah mizapi hnorsuannak a tlawm bikmi lam in daite in kan i zuam. Cu pin ah remdaih biaruahnak zong hi phunghrampi upadi remhnak ding lam pakhat a si” tiah central NLD party vice chairman-2 a simi Dr. Zaw Myint Maung nih a chim.

“Keimah zong mizapi karlak i ka um tikah democracy sernak a caan a rau tuk, kan sifak tuk cang, eidin awk kan ngei ti lo tiah biasiphainak a tam. A biapimi cu democracy thlenremhnak hi kanmah nih dikfelte a thanchonak ding kan tuahtuan ko” tiah U Nyan Win nih a chim.

Atu phunghrampi upadi ning ah Tatmadaw lutlai zik nih min cazin a pekmi lawng Pyi-htay-zi minister ah rianpek an si caah Pyi-htay-zi zung hi tlaih le tawlrel an har tiah Mandalay ramthen in Chief Minister Dr. Zaw Myint Maung nih thawnglatu pakhat sin ah a chim.

“Fianghlangte in chim ko ahcun cozah bu nih Pyi-htay-zi minister cu rian pek a si lo caah tlaih le tawlrel an har bak ko. Asinain Pyi-htay-zi hi cozah tang i an um lo caah kanmah zohfel awk an tha lo timi tu cu a si lo. Hluttaw zong nih hi cozah rian vialte cu a ngiat, a zohfel dih ko” tiah Dr. Zaw Myint Maung nih a chim.

Cuti Pyi-htay-zi nih nawlngeihnak an ngeihmi cu NLD nih phunghrampi remh an duhmi biatlang 168 chung ah aa tel tiah theih a si.
Ref: 7Day Daily

Na ruahning rak langhter ve.. (Leave a comment)

%d bloggers like this: