Uknak Lak Hnu In Ralhrang Phu Nih Inn 100,000 Leng A Khangh Cang

By Salai MLT| The Chinland Post — Kum 2021 uknak Ralhrang phu (State Administration Council-SAC) nih a lak hnu in 2024 October thla tiang, kum thum lengkai chung ah Ramkomh Kawlram huap in, Ralhrang le a kuttang phu nih Inn an khangh thiam mi 106,950 fai a si cang, tiah Data for Myanmar (D4M) nih hlathlainak an tuahmi chung in 2025 February 11 thanhnak a tuah.

Hi kong he pehtlai in, Ralhrang le a kuttang ummi phu nih inn 103,110 (Singkhat leng) an khangh. Cun, a dang inn 3,840 leng hi aho nih an khangh tiah theih fian a si lo tiah a langhter.

Ralhrang nih inn a khangh mi vialte ah, a tam bik hi Sagaing ramthen ah a si. Sagaing peng chung ah inn an khanghmi a dihlak hi 74,414 a si. Inn khanghmi vialte i zatuak 69 tluk a si tiah Data for Myanmar nih thanhnak an tuahmi cherchan in RFA nih a tial.

Cun, hmun dangdang ah, Magway, Mandalay, Tanintharyi ramthen le Kachin, Chin, Rakhine ramkulh telh in khua tam lak te ah inn 29,770 an khangh cang tiah theih a si.

Kahdohnak an tuah leng ah Hraimngan, Vanlawng, telh in Ti Ralkap hmang in a kah caah mipi umnak inn tampi an kangnak le rawhralnak a ruang bik a si tiah a langhter.

Inn khanghnak kong he pehtlai in biafiang theih duh ah Ralhrang chimnak nawlngeitu Ralbawi Zaw Min Tun cu RFA nih Telephone in an pehtlaih, nain lehnak a tuah duh lo. A hlan deuh ah Ralbawi Zaw Min Tun nih Ralhrang lei nih inn khangh mi a um lo tiah a rak al.

Ralhrang le a kuttang phu nih mei an khangh raungah 2021 mipi umnak inn 2,111, kum 2022 ah inn 46,856 inn, kum 2023 ah 31,484 le kum 2024 October thla dih tiang ah inn 26,350 a kangh tiah theih a si.#