Ukraine ram ah Russia nih chemical weapons a hman khawh tiah American nih a chim
The Chinland Post | 2022 March 10 – Russia nih Ukraine a tuknak chung ah chemical weapon silole biological weapons a hman khawh tiah American White House lei nih a chim.
American ngeihmi biological weapons sernak laboratory pawl Ukraine chungah a um tiah Russia nih sual a puhmi cu sullam ngei lo a si tiah White House in biachimnak nawl a ngeitu Jen Psaki nih reporters pawl sin ah a chim. Russia nih a dik lomi thawngthanh in raltuknak a thok kho men tiah American nih a chim.
Russia nih Ukraine a tuknak chungah hman loding tiah riikhiah a simi hriamnam pawl a hman khawh men tiah nitlak lei ram hna thinphang in an um.
Nitlak lei raltuknak kong he pehtlai in thil sining a zuldawitu pawl nih chemical weapons lawng si loin nuclear weapons zong aa tel chih kho men tiah chim a si ko nain BBC thawnghlattu nih chemical weapons kha chim duh deuhmi cu a si tiah a chim.
Syria raltuknak lio ah Russia nih an hnulei in a dirpimi phu pawl nih chemical weapons an rak hman bal caah a tu bantuk in thinphannak a chuah hi a si.
Ukraine nih chemical weapons a hman timi thawngpang dik lo hna thanh in raltuknak a zualter chin kho tiah raltuknak lei thiamsang pawl nih an langhter.
Ref: BBC Burmese
