UNHCR Chief : Chin ralzaam humhimnak dihdonghter ‘Cessation’ biafang hi hman ding a si lo

UNHCR Chief he tonnak

TCP Online| 2019 March 5 – UNHCR Malaysia zung ah lutlai ngan bik Mr. Thomas Albrecht (Chief of Mission) nih humhimnak dihter (cessation) timi biafang hi rak hman ding a si lo, atu hnu hrimhrim zong ah hmang tihlah u tiah 2019 March 1 (cawn ninga) i CHRO, ACF upa le ICC upa na he tonbiaruahnak an ngeih lio a chim tiah kan theih.

Hi kong he pehtlaih in tonnak ah a telmi Community hruaitu upa pakhat nih a tanglei bantuk in Chinland Post ah a chim.

“Kan duhmi vialte cu a kan hruaitu upa nih an chim i, an hal dih hnu ah biahalnak in kan peh. Cu biahalnak ahcun, UNHCR nih ralzam hna i thim ding pahnih (option 1 le 2) hi 2019 Feb. 15 in cun i thim a si ti lo. Kan i lawm lai maw, lawm lai lo ti zong kan fiang lo. Cucu, zei ruang ah dah a si, humhimnak hi tah Chin ralzam caah cun dihdonghter (cessation) cu kan si lai maw? A tha maw kan si, a chia dah? tiah kan hal tik ah, atu bantuk in a kan leh hi a si”.

‘Cessation’ timi humhimnak dihdonghter timi hi rak hman lo ding mi bak a si. UNHCR nih ram pakhat ah thlennak a um ahcun, kan tuah tawnmi sining zohthannak ‘reveiw’ cu a um tawn ko. Nain, atutan Chin miphun ralzam hna caah hin, zei ruang ah dik an rak hman. Rak hman ding a si lo i, hi hnu zong ah hmang ti hlah u. Cun, option 1 le 2 thim ding kong ah thim a hau ti lo. Kan tuah hrammi a si. Hi zong a tha lei in nan ruah khawh. Atu lio ah, kan phung kan zohfelnak (review) ah a telmi a si. Cucaah, hi bantuk kan tuahmi sining zohthannak ‘review’ hlawntlin khawhnak ding le thlenremhnak (change) a um khawhnak ahcun, Chin ramkulh le Kawlram sining tha tein thawng kan theih peng a hau. Cucu, a biapi tukmi a si tiah Thomas nih cun a chim.

Mr. Thomas Albrecht, UNHCR Chief of Mission (Malaysia) he zaanriah dumtinak

Cun, Ralzam Sining Biakhiahnak (Refugee Status Determination-RSD) lutlaitu zong nih, “Laitlang le Kawlram sining hi nuhrin covo kong theng silo in, a tlangpi in zatlang thanchonak, lam le sul, pehtliahnak dangdang thanchonak, chawlehthalnak lei thanchonak, tbk. tiang kan theih dih a hau. Cucu lawng ah biakhiahnak a dikfelmi le a hmanmi kan tuah khawh lai tiah a chim.

March 1 ah UNHCR zung le Australian High Comission he tonnak an ngeih dih hnu in, Senator tawlrelnak in UNHCR le Australia High Comission upa hna he zaanriah eitinak zong an ngei. Cu ahcun, UNHCR Malaysia lutlai bik Mr. Thomas Albrecht lawng silo in, Acting Australian High Commission Mr. Michael Growder le Nuhrin Covo lutlai simi le First Secretary Jane Bartlett zong an i tel tiah kan theih.

Community upa pakhat nih, ‘atu bantuk in Chin ralzam nih kan duhmi poah chimrel khawhnak caantha kan ngeih khawhmi hi kan ruahning leng a si. Kan tong bal lo. Kan duh herhmi poah zalong tein kan chim khawh dih, caan saupi biaruahnak kan ngei kho i kan i lawm taktak’ tiah Chinland Post ah a chim.

Tutan UNHCR Malaysia, Australian High Commission Malaysia le Chin upa (CHRO, ACF le ICC) hna tonnak hi Australia in Senator Dean Smith tawlrelpinak le tlangtlaknak in a si tiah kan theih.

Na ruahning rak langhter ve.. (Leave a comment)

%d bloggers like this: