UNHCR nih Chin miphun ralzam caah phung an tuahmi an remh than cang

0

Editor, 2019 March 14| UNHCR zungpi umnak Geneva le Bangkok in Chin miphun ralzam caah phung an sermi humhimnak pek tilo ding timi phung cu 2019 March 14 ah an remh than cang tiah theih a si.

2019 March 14 nithla in UNHCR nih cathanh an tuahmi ah hitin an langhter;

Ramkomh Kawlram sining thatlei panh lo in sining hnu a kherhmi a um ruang ah Chin miphun ralzam dirhmun in a ummi hna hi humhimnak ngol lo in pehzulh in pek than ding a herh.

UNHCR nih biakhiahnak kan tuah bantukin Chin miphun cu humhimnak (international protection) pehzulh in pek an si lai. Hi biakhiahnak bantukin Chin ralzam hna cu an ralzam sinak chuh lo in pehzulh in zohkhen ding tiah an thanh.

Atulio ah UNHCR cazin ning in Chin miphun ralzam hi 18,000 leng an um. A bik in, UNHCR zohkhennak tang ah Malaysia ahhin 15,000 leng an um. Cun, a dangdang India, Nepal le Thailand zong ah Chin razlam hi an um tiah an cathanh nih a langhter.

Kan hnu kum 2018 ah UNHCR nih hlathlainak tuah in biakhiahnak rak tuah. Cucu Chin miphun ralzam hi humhimnak pek tilo ding tiah an rak thanh.

UNHCR nih 2018 June ah thawngthanhnak a tuah hnu ah, Ram chung sining le harsatnak kong he pethlai in report tampi an don. Hi bantuk ruang ah, biakhiahnak cu kan zoh than tik ah, Chin miphun ralzam hi humhimnak pek an hau rih ko tiah biakhiahnak an tuahmi cu an thanh.

Chin miphun ralzaam hna caah a dikfelmi biakhiahnak a um khawhnak hnga ding caah a lamkip in a tangmi zatlang bu le Chin community hna chimrelmi zong biapi ah an chiahmi an langhter.

A hleikhun in atulio, thlanglei Laitlang ah a cangmi kong ah an lungthatlonak an langhter fawn. Cu kong he pehtlai in, UNHCR zong nih cathanh rak chuah a si cangnak zong an cathanh ah an langhter chih.

Hi bantuk sining ruang ah, UNHCR nih Chin ralzam pumpak hlathlainak (interivew) tuahmi (individual review process) cu ngol ding in biakhiahnak an tuah.

Thlanglei Laitlang a cangmi kong ruang ah tlikzam in a ummi an um bantuk in, Kawlram sining zoh tik ah, Chin miphun ralzam hna hi UNHCR nih humhimnak pekmi hi pehzulh a hau tiah UNHCR humhimnak lutlai chang simi Volker Türk nih 2019 March 14 cathanh ah a chim.

Cun, kan rak i timh bantukin le UNHCR phung bang, kan biakhiahnak hi kan zoh than lengmang lai, a bik in Laitlang ah a cangmi ngiathlainak hi pehzulh in kan tuah lai tiah a chimchap.

2018 June cathanh ruang ah zohthannak (review) kan tuahnak in nihin tiang ah Chin miphun ralzam a hohmanh nih Ralzam sinnak an sung rih lo. A donghnak biakhihanak taktak tuah a si rih lo tiah theih a si.

UNHCR nih Ralzam zapi caah a tuah tawn bantukin, Chin ralzam hna caah a tha bikmi biakhiahnak a um khawhnak hnga ding le pumpak in a mah tein kir a duhmi caah a tha bik in tawlrel ding timhtuahnak an ngeihmi zong a langhter. Ramchung sining a that hnu le caan remh a phanh tik ah, UNHCR nih limhang ngeite le humhimnak (safety and dignity) he pumpak kir a duhmi caah a herh ning in kan i zuam lai lai tiah an langhter.

Cun, UNHCR nih a hlei khun in Chin ralzam latu hna ram vialte nan cung ah kan i lawm tiah an chim.

Ref: UNHCR Cathanh

About The Author

Na ruahning rak langhter ve.. (Leave a comment)

%d bloggers like this: