UPC Khirhfabu PYD Icon Hlasak Zuamnak Ah Mai Van Hlei Iang Nih Pakhatnak A Co

Salai CungCung|2019 April 8| UPC Khirhfabu FBYM (Five Brother Youth Ministry) tawlrelnak in tuahmi PYD Icon hlasak zuamnak ah Mai Van Hlei Iang nih pakhatnak laksawng Sing 10 le trophy a co. Top 5 tiang a phanmi cu special guest sawmmi 5 he album pakhat an i chuahti lai tiah kan theih.

“Hi hlasak zuamnak ah Top 5 tiang a phanmi cu special guest sawmmi minung 5  he album pakhat an i chuahti lai. Pakhatnak a hmumi cu ramchung ramleng kanmah UCP khirhfabu chung in hlasak um kal khawhnak kan tuahpiak lai” tiah  Five Brother Youth Ministry president John Fready nih The Chinland Post ah a chim.

Hi PYD Icon hlasak zuamnak cu pakhatnak ah Mai Van Hlei Iang, Pahnihnak ah Salai Bawi Min Lian, pathumnak Mai Bethsheba, palinak Mai Biak Hlawn Zing, panganak Mai Merry Par an si tiah kan theih.

PYD Icon hlasak zuamnak ah judge tuantu hna cu; Pu Herh Lian, Mang Lian Chawn le Maikimmi an si. Hlasak aa zuam khomi zapi 26 an si. Zuamnak caah laksawng cu Pakhatnak tangka Sing10 le trophy, pahnihnak tangka Sing 7 le trophy, pathumnak tangka Sing 3 le trophy an si. Hlasak aa zuammi 26 chung in top 10 an thim colh hna. Top 10 in top 7, top 7 in top 5 , top 5 in winner thim colh an si tiah kan theih.

Hi hlasak zuamnak ah music a tumtu hna cu; Lead Guitar tum Pa Biak, Bass Pa Khar, Rhythm  Thawngpi, Keyboard Sang Ceu, Drum Kawi Thawng an si . Special guest hlasak thiam sawm mi hna cu Zion Par, Bawi Hlei Cuai, Lal Tha Chin Sang le Hre Mang an si.