Update: A Ni 9nak Tiang Ah Quarter Final Kai Ding Phu 6 An I Fiang Cang
City Hunter| 2018 May 31| May 22 in thawkmi Hakha Khrihfabu kip pumpululh chuih zuamnak a ni 9nak tiang ah phu 5 cu quarter final chuih ding ah group in an awng cang. A ni 9nak tiang an chuihmi ning in quarter final kaiding aa fiang cangmi cu a tanglei bantuk in an si.
Quarter Final A Kai Cangmi
1. Free Methodist Church (FMC)
2. Believer Church Myanmar (BCM)
3. Gospel
4. United Pentecostal Church (UPC)
5. Senthang Baptist Church (SBC)
6. Roman Catholic (RC) an si. RC, SBC le CJC hi Group pakhat an si. RC le CJC hi mark khat hmanh an hmu veve lo. RC le CJC an chuih ah 0-0 in an i tluk. RC le SBC an chuih ah SBC nih 2-0 in an tei hna. Cun SBC le CJC an chuih ah SBC nih 4-0 in an tei hna i RC nakin CJC hi an sunghning a fah deuh caah an tla i RC tu hi an kai lai tiah Hakha peng Zaanglekcelh zung in tuanvo ngeitu lutlai Pu Jacob sin in kan theih.
June 1 chun hnu ah an chuih dingmi le a tang rihmi puai sin hna cu a tanglei bantuk in an si.
• 1.6.2018 suimilam 1:00pm ah AG le MEC, suimilam 3:00pm ah Olive UPC le Hniarlawn,
• 2.6.2018 suimilam 1:00pm ah Calvary le MBC, suimilam 3:00pm ah Chuncung le Grace an chuih lai.
Group D le Quarter Final
June 2 ah Calvary le MBC an chuih lai i Calvary hi an awn si cun quarter final an kai lai. MBC an awn belte ahcun MBC hi quarter final an kai ve lai. An i tluk si cun MBC an tla lai i Calvary hi quarter final an kai fawn lai. Cucaah, MBC nakin Calvary hi quarter final kai khawhnak ding an lam kau deuh. MBC quarter final a kai khawhnak ding lam pakhat lawng a ngei, cucu Calvary kha teiding in chuih lawng a si.
Cu bantuk in June 2 thiamthiam ah Chuncung le Grace an chuih lai. An i tluk si cun Grace an tla lai i Chuncung hi quarter final an kai lai. Grace an tlak si cun Group D in Calvary le Chuncung hi quarter final an kai lai. Cun, Grace nih Chuncung kha an tei hna a si ahcun Chuncung an tla lai i Grace le Calvary kha quarter final an kai ve lai.
Amah belte Chuncung le Grace an chuih tikah kawl ngei lo in an i tluk sual i Calvary le MBC an chuih tikah MBC nih an tei sual hna a si ahcun Grace le Chuncung an tla lai i MBC le Calvary kha quarter final an kai lai. Cucaah, Group D ahcun Calvary hi quarter final an kai khawhnak ding a lam kau bik.
Tutan Khrihfabu kip pumpululh chuih zuamnak ah aa tel khomi phu 15 an si. Nikum ah champion a rak cotu cu Free Methodist an si.
About The Author
