Update: Motor Pah Nakin Tlangval Nun Thar A Kehlei Ke Le A Orhlei Kut A Kiak
TCP-Hakha| 2018 Tho 22| Tlangrua khuami tlangval Nun Thar cu motor cycle aa cit lio ah motor he an i pah i a kehlei ke le a orhlei kut a kiak. Atu hi Hakha sii-inn operation an tuah i an thlopbul liopi a si.
Tlangval Nun Thar hi a kehlei ke kha hmun hnih in a kiak i a orhlei kut kha pakhat a kiak. A hmur le a mittlang zong an tlek. Lungfim lo in a um. Sii-inn an phak pi hnu ah operation an tuah colh i atu hi sii-inn an thlopbul liopi a si. A nundamnak kong ah thinphan tuk ding a si lo tiah siibawi te nih an ti.
Tlangval Nun Thar hi kum 17 a si, Tlangrua khuami Pi Hoi Thai fapa a si. Hakha No.2 siangsangrun ah economic in tanghra a kai liomi a si. Nihin (October 22) hi camipuai an dih ni a si.
An i pahning cu hithin a si; October 22 chun suimilam 12:00 hrawng, Hakha Khuathar Carson Biakinn hmai ah a si. Tlangval Nun Thar cu motor cycle aa cit lio ah atu bantuk in Pajero motor a pah i faktuk in aa hliam caah motor mongtu nih Hakha sii-inn ah a kalpi colh.
“Hi Motor le Cycle an i pah cu Motor hi a palh deuh ko, zeicatiah motor hi Thantlang lam lei in a ra i a hmai ah motor nganpi thil phormi kha ka lawnh lai a tinak ah lampi a ri an rinmi leng a lonh i lam zulhphung a buar. Cu lio ah tanghra kai liomi siangngakchia pa cu cycle in a ra ve i motor nih lam zulhphung a buar caah cuka ah cun an i pah hi a si. Cun motor ngeitu pa nih Cycle mawngtu pa cu amah motor in Hakha Sii-inn ah a kalpi colh” tiah cu accident lio a hmutu lamkam dawr tuahtu pa nih The Chinland Post ah chim.
“Cycle mawngtu siangngakchia pa hi fak tuk in aa khawn caah a pahtu motor nih Sii-inn ah an tlikpi colh. An i pah lio ah hin Cycle mawngtu pa hi a hmai ah a thi a chuak. Cun a ke hi a kiak ko rua, fak tuk in aa khawng i amahte in a kal khawh lo caah kan thinphang ngai. Anih hi Sianginn kai lio mi te a si” tiah poipang tonnak hmun i a um vemi hna nih The Chinland Post ah an chim.
Hliam a tuartu le a pahtu hna chungkhar hi i rem ding le a thatnak bik in i thlopbul ding in khuakhannak an ngei tiah kan theih.
Hika ah kan tarciami rel khawh a si.
About The Author
