Update: Ngakchia 11 An Chuahpi Cang I An Saya Pa Le Ngakchia Pakhat Zong An Chuahpi Lio Hna
City Hunter | 2018 July 10| Kawlram caan in July 10, suimilam 5:00pm tiang ahkhan Thai ram, Chiang Rai pengkomh, Tham Luang lungkua ah aa taapmi ngakchia 11 an chuahpi khawh cang hna tiah vawleicung media minthang CNN le Reuters cherhchan in theih a si.
“Nunchanhnak rian a nithumnak suimilam 5:00pm (Kawlram caan in) ahkhan ngakchia pathum an chuahpi chap khawh cang hna. Atu hi lungkua chung ah ngakchia pakhat le an saya (coach) pa lawng an taang cang. Anmah pahnih zong cu ngakchia a zohkhenhtu siibawi pa telhchih in lungkua chung in an chuahpi lio cang hna. A rauh hlan ah leng ah an chuahpi khawh ko cang hna lai” tiah CNN, Reuters le media dangdang nih an thanchuah cang.
July 10 zingka suimilam 10 thawngfianternak ah, “Ngakchia pali, an saya pa (coach) le anmah a zohkhenhtu siibawi pakhat cu ti ralkap, tilio thiam hna nih nihin ah an chuahpi dih ko cang hna lai” tiah Nunchanhnak lei tawlreltu Chiang Rai pengkomh lutlai nih a chim.
“July 8 ah ngakchia pali, July 9 ah ngakchia pali, a nihnihnak tiang ngakchia pariat an chuahpi khawh cang hna. An zapite in Chiang Rai sii-inn ah chiah le zohkhenh an si. Mah ngakchia pariat cu kum 14-16 kar lawngte an si. An ngandamnak kong ah thinphang ding a um lo. A rauh hlan ah ngakchia chungkhar hna he zong hmuhtonnak an ngei kho te ko lai” tiah July 10 zingka thawngfianternak ah ngandamnak minister nih a chim.
A nithumnak nunchanhnak rian cu Thai ram caanrelnak in suimilam 10:00am in an thawk than i atu hi an zapi minung 11 an chuahpi cang hna tiah theih a si. Asinain, July 10 suimilam 4:20pm tiang ahkhan cun anmah Thai cozah le nunchanhnak lei riantuantu nih phungningte in an thanhmi cu minung 9 tiang lawng an si rih. Sihmanhsehlaw, minung 11 an chuahpi cang hna tiah media dang nih an thanh hi cu suimilam 5:00 ah khan a si cang.
July 6 zingka ahkhan ngakchia pawl lungkua chung ah oxygen dur a pechaantu Thailand ti ralkap bawi hlun a simi tilio thiam pa Gunan cu lungkua chung ah a thi. Ngakchia pawl oxygen dur a pekchanh hna hnu a kir lei ah oxygen dur aa kenmi nih a dihtak ruang ah a thi tiah theih a si.
Hi ngakchia 13 cu June 23 ahkhan lungkua chung ah an luhnak in atu bantuk in an taapnak hi a si.
Ref: Thai Navy Seal, VOA, Reuters, CNN
About The Author
