UPDJC_ Ramkhel Party Phu Nih Remhdaihnak Kalpi Cuahmahmi Chin Ramkulh Cozah, Hakha Mizapi le Zatlangbu Sin Chimphuannak An Ngei

Ramkomh Daihnak Ceihhmaitu Phu (Union Peace Dialogue Joint Committee _UPDJC) tang a ummi Ramkhel Party phu (Political Parties) phu nih Chin ramkulh Cozah upa hna, Hakha mizapi, CSOs pawl sin ah Remdaihnak kalpi cuahmahmi kong chimphuannak cu January 10, 2019 Carson Hall ah minung 180 fai he an ngei tiah theih a si.

UPDJC tang Ramkhel Party phu ahhin Kawlram chung Political party phu 90 leng a ummi chungin teinak a hmumi Party 24 lawng telh a si. Kawl party in USDP, NLD, NUP le Democratic Myanmar le tlangcung party an si hna. Tlangcung party chung ah Chin party fonhmi Chin National League for Democracy (CNLD) chungtel in Chin League for Democracy (CLD) in Matupi MP pakhat an ngeih caah UPDJC Ramkhel phu ah aa tel ve i Zaukphung Ramkomh bu sernak ah Chin ai awh in ceihhmainak nawl an ngei ve.

“Tutan Hakha kan tuahmi hi Mi tlawm te kan  kai nain Ramkulh le Ramthen dang he kan idannak sining an hmuh, Mi tlawmte, harsa kan si nain miphun dang he aa cawh lomi miphun kan si mi zong an hmuh tikah an khua ruah harnak tampi a um. Khrihfa ram a si bantuk in Khrihfa hruainak in thil tampi a kal ti zong an vun hmuh. Kan ilungsi ngai ko. Hika a rami Party 24 in policy 24 he a rami kan si nain Democracy federal kan kallai timi ah kan lung aa khat ko. A dang cu ceihhmai in kal ti ding a um rih” tiah puai tawlreltu le tuanvo ngei Pi ChinChin PekThang nih The Chinland Post ah a chim.

Remdaihnak Kalpimi Chim Phuannak_ UPDJC_PP

“2020 kum Thimnak ahhin mah le Ramkulh ahcun mah le miphun party thawng sehlaw rampi dirhmun ahcun tlangcung Party a kan dawtu le kan policy he a kalti khomi siseh tihi kan itlaihmi a si. Tlangcung party kip nihcun mah le ramkulh cio ah miphun party kan tei a hau timi hi an itlaih ciomi a si ko. Remdaihnak kalpi cuahmah mi ahhin Ralkap le Kawl party nih tlangcung mi kong ahcun an lung aa khat, tlangcung party zong nih lungkhat tein kan kal hrimhrim ahau kan lung a fiang. Remhdaihnak zong  hnu kir lo in hmai ah kan kal ahau, remdaihnak cu kan chuahpi hrimhrim ahau, na tein a har cu a har ngai lai. Har hmanh sehlaw kan kal hrimhrim aherh timi cu kan zapi lungput a si” tiah a biapeh ah a chim.

“Tutan kan tuahmi hi Ramkhel phu nih Thlakhat voikhat ramkulh ramthen kip kal in mizapi he tonpumhnak kan tuahmi a si. Kan tuah hnawhchannak cu ramkhel party, zatlangbu, biaknak lei hna sawm in remdaihnak in democracy federal ram kan sernak ah zeitluk in dah zatlangbu le mibu an biapit timi hi chim rel hi a si. A bik in remhdaihnak tuahcuahmahmi cungah zeitin dah mizapi, mibu nih an hmuh timi zong hlathlai duh ah a si. Tlangcung party pawl kan biapit bantuk in mah ramkulh hrambunh tlangcung party cio dirhmun zong a biapi ngaimi a si. Chin ramkhel party pathum zong an ifonh cang tiah ka theih. Fonh lawnglawng in a za lo, 2020 thimnak ah zeitin dah teinak kan hmu khawh lai. Cu teinak in cun Ramkulh kip a ummi tlangcungmi party he zeitin dah bukomh (alliance) ah kan ser khawh lai timi zong kawl a hau. Cu bukomh kal tik zongah Cozah ser khawh sawhnak ca silo in Federal Democracy kan kalnak ah kan policy aa khat maw, kan kalti kho taktak lai maw tihi ruah ngaingai kan hau. 2010 thimnak ah Tlangcung party nih 12%, 2015 ah 9% lawng kan tei. Kan hmuhmi a tlawm tikah ralchan party kan si kho lo. Phunghram tlawmte remh kan duh kan ti zongah 20% kan bau rih. Cucaah 2020 thimnak ahcun 2010 le 2015 thimnak lonh in 20%-30% hmuh dingin kan tuah lai. Cu tik ahcun Kawl party ngan pawl nih  an kan chonh te lai. Tlangcung mi party nih tlawmtuk 5%-10% tei in Kawl party ngan nih an kan chonh lomi kha cu ingaichiat ding a si lo. Cucaah tlangcungmi party pawl nih zeitin dah hmailei zeitin dah kan kalpi lai tihi kan tuanvo kan ihrimh cia ahau. Cu kalti tik zongah kan policy aa khat ding ahau” tiah UPDJC Secretary U Sai Kyaw Ngunt(SNLD) nih The Chinland Post ah a chim.

Inntek ramkhel party upa le zatlangbu hruaitu hna he zong UPDJC in remhdaihnak a kalpimi chim phuannak zong January 9 CACC Hall ah tuah a si. January 9 zan ah Chin National League for Democracy (CNLD) nih siseh, January 10 Chin ramkulh Cozah chimrelnak nawlngeitu le Sipin Vuanci U Soe Thet nih lunglawmhnak laksawng siseh, January 10 zan ah Chin National Front (CNF) nih donnak zanriah dumtinak le thlahnak an tuah hna tiah theih a si.

Leave a Commnet

%d bloggers like this: