US Chinmi Ca Thawngchia: US Rammi Sinak A Soktu Immigration Nih Cithlatnak A Tuah Than Hna
TCP-Online| 2018 February 28| US ram ah rammi sinak (Citizenship) a soktu hna cu US Immigration (Lah-wah-kah) nih an konglam cithaltnak a tuah than hna ti kan theih. Hiti US rammi sinak a soktu hna hi a bikin Malaysia lei in a phanmi an tam khun ti zong theih a si.
Hi kongah US ram Indiana hrambunh BACI tiah auhmi Kawlram mi pawl zohkhennak bu i President Dr. Rodinga nih;
“Kan theih khawh tawk cun 2005-2006 kum lio khan Malaysia ah Kawlram mi (Ralzaam) pawl min cazin an rak lak lio khan min aa thuatmi/aa lomi an rak tam tuk. Tahchunnak ah ralzaam pakhat nih a min, chuah kum le a nulepa min a pek hna. Cu pa/nu thiamthiam nih cun cuti min aa lomi he cun a dang ah a va pek than. Malaysia lio khan cun zei a va poi lo. US an vun phan. US an phak i Citizen an sok tik ahcun a buai cang. Min, chuah kum le nulepa min aa thuatmi/ aa lomi a tam tuk tikah minung pahnih thum hna aa thuatmi an um cang. Cutikah US cozah ca zongah Green Card heiti Citizen pekawk a tha ti lo. Hiti a si tikah 2002 kum lio khan US ramleng Minister zung lei nih ‘Fraudulent case’ tiah auhmi Malaysia ram in US a rak lutmi min aa lomi an rel tikah hna ah thong 9 hrawng a si. Mah buainak cu atu ah tha tein tawlrel than an timh le si ko lai ti ka ruah” tiah a chim.
Atu bantuk in US cozah lei nih a auh cangmi hna cithlatnak a tuah tawk hin buainak cu a um rih lo. Hiti cithlatmi ah hin Malaysia in US ram a phan deuhmi lawngte an si rih hna. India lei in an phanmi ralzaam cu an um rih lo.
Hi kongah US cozah nih Malaysia hrambunh UNHCR zong Warnining a pek cang hna. Hiti a pek tik hna ah Kawlram ralzaam minung thong 4 leng US phan ding zong an phak khawh rih lonak a si ti zong Dr. Rodinga nih cun a chim chap.
Malay UNHCR nih 2013 kum khan ralzaam min cazin lak a phih cang hna i 2013 hlan paoh i min cazin a rak pemi hna cu atu ah an buai cuahmah lio zong a si i US ram luh zong US cozah nih an kham rih lio hna a si ti thawng kan theih.
Ref;VOA
About The Author
