US Le Iran Karlak Dohnak; Ral An Tho Lai Maw?
The Chinland Post – January 8, 2019
Buainak hram aa thawhning
January 3, 2020 ah Iraq ram khualipi Baghdad ah Iran Major General (Boyoke Gyi) Qasem Soleimani cu US ralkap nih vanlawng bualrawn (Baghdad International Airport), Iraq caan zinglei sml 1 (1:00 am) ah U.S. drone in an thah. Hi thahnak cu US President Donald Trump nawl peknak in a si. Amah he telh in Iran nih a bawmhmi Iraq pi-thu-sit timi Popular Mobilization Forces in ralbawi Abu Mahdi al-Muhandis le a dang pathum an thi.
Maj. General Soleimani cu hodah a si?
Qasem Soleimani hi Iran nih ramleng ral kilvennak caah le ramri humhimnak ah a dirhmi Islamic Revolutionary Guard Corps (IRGC) ralkap lutlai a si. Abik atu lio ah ISIS a doh cuahmahmi le ramdang mi nih Iran hnahnawhnak a pe khomi dohtu a si. Naitan ah Iraq ram ummi US Embassy nih mipi nih an buai hnawh i Iraq ram US Ambassador pa zong aa thup. Hi bantuk in mipi nih US Embassy dohnak ding ah a hnulei in rian a tuantu cu General Qasem Soleimani hi a si tiah US cozah nih a zumh. Cu pin ah Iraq le Middle East ram ah a ummi US cozah riantuantu, ralkap le US mipi thahnak hi a tuah tawntu a si tiah President Donald Trump nih a chim. Middle East ah a ummi US miphun le cozah riantuantu vialte dohding le thah ding ah General Qasem Soleimani nih aa timh peng caah atu bantuk in President Trump nih thahding in nawl a pek hna hi a si.
“General Qasem Soleimani cu kan thah cang. Hi ka thahnak a ruang cu hmailei ah a chuak dingmi ral tuknak khamhchungnak caah a si. Qasem Soleimani hi a hlanpi in rak thah ding a si cang. Middle East ah a ummi US cozah riantuantu doh le thah kan tonmi ah tuanvo ngeitu bik a si. Atu bantuk in mithat lainawng kan thah khawhmi nih hmailei ah a chuakding US miphun thihnak le rawhralnak tampi a him ter. Iran mipi nih lam zawh in an au lio zong ah Iran mipi a thattu lila zong a si. Iran mipi zong nih an duh lomi pa a si. An tih ruang ah holh lo in a ingmi Iran mipi an tam tuk,” tiah President Donald Trump nih a chim.
General Qasem Soleimani hi Iran ram ah nawlngeihnak a ngei bikmi ah aa telmi a si.
Iraq cozah lehnak
Iraq khualipi ah Qasem Soleimani thah a si cangka in Iraq ram uktu Prime Minister Mahdi nih US tuah tonak cung ah lehnak a tuah colh. Iraq nih US ralkap a ram chung ah a umter mi hnatlaknak a buar. Iraq cozah le ram uknak upatnak a ngei lo. Hi nih US cozah cung ah Iraq rammi thingthunnak a tlunter lai tiah a ti. Ni tlawmpal ah Iraq Parliament ah Iraq ram in US ralkap thawl ding thimfung an thlak. Parlianment nih US ralkap Iraq ram in chuak hna seh tiah bia an chah. US ramleng vuanci zung nih Iraq ram in US ralkap kan chuak lai lo tiah alnak a ngei colh. President Trump nih atu bantuk in Iraq Parliament nih bia a chahmi kong ah US nih sipuazi phihkarnak a tuah lai tiah ralrinnak a pek hna.
Iran Cozah Lehnak
Iran nih General Qasem Soleimani a thih cangka in amah ai-ah lutlai cangtu Bohmuyoke Esmail Ghaani cu rian an pek colh. Iran nih faakpi in US cung ah lehrulnak kan tuah lai tiah Qasem Soleimani hawi thabik a simi le Iran President saupi a tuan balmi, atu lio Iran Supreme huaitu Ali Khamenei nih a chim. January 4 ah Iraq khualipi in Iran kalpi ding ah Soleimani ruak cu an thlah i Iraq Prime Minister zong a kai ve. Soleimani a tanhmi tampi nih Iraq thanthar (Flag) an in put i, American le Israel cung ah thihnak tlung seh – “death to American, death to Israel” tiah an au.
Soleimani ruak cu Iran ah January 5 ah an tlunpi. Iran nih rammi dihlak nih nithum chung ‘ngaihchiatnak’ hmanding in thawng a thanh. Iran President Hassan Rouhani nih ‘US nih Iran cung ah tihnung palhnak a tuah. Lehrul kan cham lai’ tiah thawng a thanh. Soleimani ruak cu January 7 ah vui a si i Iran mipi sing hnih leng nih a ruak an thlah. A ruak thlahnak ah mipi 30 renglo ipahnak le thawpitnak in an nunnak a liam.
Iran President nih US lehrulnak kong a chim cangka in US President Trump nih pumpak a hmanmi TWITTER in lehnak a tuah colh ve. Iran nih US kan thilri a hrawh i a kan doh ahcun ‘riangrang tak le fak taktak in lehnak kan tuah colh lai,’ tiah a ti.
Soleimani ruakthlah ni ah Iran nih “President Donald Trump alu cu 80 $ millions in an hauh. A that khomi paoh 80 $ millions pek an si lai,” tiah an thanh. President Trump nih pumpak Twitter in, “ka lu chim lo, keimah nawl tel lo in ka samfa pakhat a la khomi paoh 100 & million kan pek hna lai,” tiah a lehrul ve hna.
Iran Lehrulnak le US A Kahnak
A rau lo. General Soleimani a ruak an vui a thaizing January 8 ah Iran nih lehrulnak a tuah colh taktak cang. Iran ralkap nih Soleimani lehrul chamnak caah Operation Martyr Soleimani min bunh in Iraq ram ah US le a hawile vanlawng ralkap umnak sakhaan pahnih cu Missiles in a kah. Iraq ram Ayn al-Asad US vanlawng ralkap sakhaan le Erbil ah a ummi US vanlawng ralkap sakhaan pahnih cu Kawlram caan zinglei sml 5: 45 am in 6: 15 am tiang Missiles in a kah hna.
Hi US ralkap umnak hmun hi ISIS (ISIL) dohnak caah a bik in hmun khurnak a si. President Trump zong nih Iraq a tlawn lio ah a vehnak le US ralkap sin ah bia a va chimnak a si. Cun October 2019 ah an thahmi ISIS hruaitu Abu Bakr al-Baghdadi dohnak ah hmunhma biapi tuk a si.
Iran nih Soleimani lehrulchamnak caah atu bantuk in US ralkap umnak kan kahmi hi a si. Ral thawh duh ruang ah kan tukmi si lo in “Iran” kan i ven chungnak caah kan kahmi a si tiah Iran cozah nih thawng a thanh. Iran cozah nih, “atu US ralkap vanlawng kan kahmi hi Iran runven nak caah a si. US nih hi cung ah lehrulnak a kan tuah ahcun faakpi in lehrulnak kan ngeih than ve lai,” tiah thawng a thanh.
Iran nih “US ralkap umnak Iraq le Syria ah hmunhma 50 cu faakpi in ka tah rih lai a ti. Cun Saudi Arabia ram um US ralkap zong an luat lai lo,” tiah ralrinnak a pek chap rih.
Hma pumi
Iran kahnak ruang ah hma a pumi thawngthanh a um rih lo. US cozah a hawile ralkap a si mi nih cun an ram in Iraq ah a ummi an ralkap an thi lo tiah thawng an thanh. Thawng a thanh cangmi hna pawl ah aa temi cu Poland, Denmark, UK, Norway le Canada hna an si. Cun Iraq zong nih kan ralkap in hma a pumi le a thimi an um lo tiah thawng an thanh ve.
Iran nih cun an Missiles kapnak in US ralkap 80 renglo an ti tiah a thi. “US ralhrang” “US Terrorists” tiah biafang a hman. Cu pin ah US helicopter le motor le thilri tampi kan hrawh tiah a thanh. Missiles in voi 15 a dihlak in kan kah tiah thawng a thanh.
Iraq ralkap nih cun Iran nih Missiles hi a dihlak in voi 22 an kah. Cu chung ah pahnih cu an puak lo tiah thawng a thanh.
Hi kahnak a chuah cangka in President nih ramleng vuanci, humhimnak lei le a cabinet pawl cu the White House ah tonnak a ngeipi colh hna. President Trump zung in chimnak nawl ngeitu nih hi kong ah President nih zeihmanh a chim rih lai lo. Mipi sin ah thanhnak a tuah rih lai lo tiah Media sin ah a chim.
President Trump nih “atu tiang cu a tha rih lo. Iran kahnak kong ah thih lonak le rawkralnak kong kan hlat cuahmah lio a si. Thaizing ah thawngthanhnak kan tuah te lai,” tiah pumpak hmanmi Twitter in ca a tial.
US le Iran karlak ral dohnak a chuah te lai maw? Cucu thaizing President nih thawng fiannak a tuahnak nih lai tampi a rel lai.
Democratic Party le ramdang cozah nih cun ral lei ah si lo in chawnbiaknak in kal seh tiin ruahnak an chuah. Repbublican hruaitu telh in President nih Iran cung ah fakpi in a lehrulnak a ngeih ding a si ko tiah ral dohnak lei khua a ruatmi zong tampi a um.
Zoh chihmi: BBC, CNN, Aljazeera, VOA Burmese
About The Author
