US Nih Malaysia, Thailand Le India In Ralzaam 4,000 Lawng A Laak Cang Lai

The Chinland Post| 2018 Tho 9| 2019 US cozah kum chung ah ralzaam 30,000 lawng kan laak lai tiah US President Donald Trump nih thawng a thanh cang. Hi chung ah East Asia in Malaysia, Thailand le India in minung 4,000 lawng laak an si lai caah Chin ralzaam caah US luhnak innka a bi tuk cang tiah kan theih.

East Asia in laakmi minung 4,000 chung ah 3,000 hi Malaysia in an si lai i, a taangmi 1,000 hi India le Thailand in an si lai. 2019 chung ahhin Malaysia IOM nih ralzaam 3,500 lawng ramdang ah a kuat hna lai. US ah 3,000 a kuat hna lai i a dang 500 cu ram dangdang ah a kuat hna lai” tiah IOM (UNHCR ralzaam ramleng kaltertu bu) ah holhlet a tuanmi Lian Cenhrang sin in kan theih tiah The Chin Express nih a langhter.

UNHCR Malaysia cazin ah Chin ralzaam 31,000 fai kan um. Mah chungah US kalnak OPE le DHS interview aa lim cangmi hi 6,000 hrawng an um. Nain US nih 2019 chungah Malaysia in ralzaam 3,000 lawng a lak lai caah Chinmi cu 1,000 hmanh kan i tel kho hnga dek maw. Rohingya, Syria le adang ralzaam an tam tuk.

UNHCR Malaysia Lutlai Richard nih, “US kal ding a si ko nain 2019 chungah a kal manh lomi pawl cu 2020 chungah kal dingin khua kan in khanpiak te ko men hna lai,” tiah Chin upa pawl a rak tiam hna nain biafiang taktak a si lo tiah The Chin Express nih a langhter.

2019 US Cozah Kum chungah ralzaam 30,000 laak ding zat cu a tanglei bantukin a si.

  1. Africa : 11,000
  2. East Asia (Malaysia, Thailand le India) : 4,000
  3. Europe le Central Asia: 3,000
  4. Latin America/Caribbean: 3,000
  5. Near East/South Asia: 9,000 tiah President Donald Trump nawlchuahmi ah an langhter.

“2019 US Cozah Kum cu 2018 October 1 in 2019 September 30 tiang a si lai. US nih ralzaam 30,000 lawng laak a timhmi chung ah East Asia (Malaysia, Thailand le India) in 4,000 lawng laak a timh caah ralzaam a laak dingmi hi a tlawm taktak khi a si. Ralzaam sinak in US luhnak innka cu aa khar taktak rih lo nain innka cu kumkhat hnu kumkhat a bi chin lengmang ko cang. East Asia in laak dingmi 4,000 chung ah Chinmi lawnglawng an si lo. Thailand, India le Malaysia ah ramdang miphun dang ralzaam tampi an um rih caah Chinmi caah innka a bi tuk cang” tiah Ethnic Nationalities for Affairs Centre ah Executive Director a tuan liomi Pu Zo Tum Hmung nih The Chinland Post ah a chim.

“Obama chan ahcun East Asia in 18000 – 19,000 hrawng a laak tawn. Term hnih a tuan chung ah tam lakte Chin miphun US an lut manh. Atu cu hihi kan si ko cang. Policy in tuak a hau lem lo, tangnga Maths a thiammi nihcun kan dirhmun hi an i fiang ko cang lai. Hiti ka ti tikah Trump ka duh lo i Obama ka duh ti ruang ah a si lo. Kan Chin mizapi nih a hmaanmi thil sining (facts) an hngalh ding ka duh caah a si” tiah a biapeh ah a chimchih.

2018 kum January in May tiang US a kal cangmi Malaysia ralzaam cu; Chin ralzaam chung in minung 290, Rohingya 244, a dangdang tlangcungmi 59, an zapi 593 an si. A kal dingmi 1500 chung ah a taang rihmi hi 907 an si” tiah a biapeh ah a chimchap.

US cozah nih 2018 kum caah Malaysia ram in ralzaam 1,500 hrawng laak ding in timhtuahnak a ngeihmi chung ah 2018 January in May tiang ah 593 hrawng an kal kho cang. Atu hi minung 907 hrawng an taang rih. 2018 kum January in May tiang US a kal cangmi Malaysia ralzaam cu; Chin ralzaam chung in minung 290, Rohingya 244, a dangdang tlangcungmi 59, an zapi 593 an si. A kal dingmi 1500 chung ah a taang rihmi hi 907 an si” tiah Malaysia IOM zung ah riantuantu Eric Van Kung nih The Chinland Post ah a chim.

Malaysia ralzaam hi Newzealand, Canada, Australia le Japan nih an laak hna. Australia nihhin 202 Visa in tambik a laak cang hna. Canada le Newzealand hi an laakmi hna hi middle east deuh an laak hna. Canada hi kumkhat ah minung 70 in 100 kar hrawng a laak hna. Newzealand hi kumkhat ah minung 30 in 50 kar hrawng a laak ve hna tiah kan theih.

Ref: https://Hika ah President nawlchuahmi 
Ref: https://HIka ah The Chin Express nih an tialmi
Ref: http://Hika ah The Chinland Post nih ralzaam laaknak kong kan rak tial balmi

Na ruahning rak langhter ve.. (Leave a comment)

%d bloggers like this: