US um Hakha No. 1 Siangkaiti hawile nih Paletwa siangnakchia bawmhnak an pek hna
TCP Hakha — USA ram hmun kip ah a phan cangmi Hakha No. 1 High School ah sianginn a rak kaimi hawile nih atulio harsatnak a tongmi Hakha ah sianghleirun a kai liomi Paletwa siangnakchia bawmhnak an pek hna tiah kan theih.
“No. 1 Basic Education High School, Hakha ah 2008-09 cacawn kum ah tangkua le tanghra a rak kaimi hawile nih kan si khawh tawkte kan bawmhmi hna a si” tiah tlangtlatu Ro Sung Hniang nih the Chinland Post ah a chim.
“COVID-19 lakah, kanmah USA lei zong kan harsa kan ti ko. Nain, Paletwa lei kan unaule an dirhmun he tahchunh ahcun kan vuivai ngam ding a si lo tiah bia kan i ruahnak hna i, hi bantuk phaisa i kholh hi kan rak chuahpi mi a si. Tlawmte a si ko, nain an caah a thathnemnak tal a um hnga maw tiah hawile kom min in kan kut kan rak samhmi khi a si” tiah a chim chap.
“Kum thawk in kahdohnak a zualhmat ruang ah kan chungkhar, kan nulepa cu ralzam in an tlikzam caah inn man le eidin zalhnak man an kan kua kho lo i a harsami kan um len. Thla 2 fai kan umnak, inn man kan pek lo nain inn ngeitu nupa nih an kan theihthiam chung. Atu ah, CHRO thawng in US lei mino nih an kan bawmh, kan hnulei ah CHRO nih inn man thla khat ca an kan bawmh, an kan bawmtu vialte cung ah kan i lawm tuk” tiah Hakha Paletwa siangngakchia upa pakhat nih a chim.
“Kanmah nih khi kaa lei (Paletwa) thil sining kha kan hngalh dih lo tikah, khoika zawn ah dah tangka kan i kholhmi hman ah a tha lai ti zong a ruah awk kan rak hngal lo. CHRO in Sang Hnin Lian tu kha contact tuah in ruahnak hal kan rak i timh. Harnak a tongmi nih an herhnak paoh ah an hman khawhnak caah amah tawlrelnak poah kha kan luntlinmi cu a si ko. A tutan kan bawmhmi hna hi an inn hlan man thla khat, thla hnih ca le eidin zalhnak khi a si ko lai” tiah Ro Sung Hniang nih cun a chim.
March thla thawk ah kahdohnak a fah ruang ah sianginn khar in a kir manh lomi hna an harsat caah, Chin ramkulh cozah in Minister Soe Htet nih tangka Kyat 500,000 siseh, a luan cia zarh hnih ah facang 10 a cawk piak hna tiah kan theih.
Paletwa peng chung ah, Kawl Ralkap (Tatmadaw) le Rakhine Ralkap (AA) kahdohnak ruang ah siseh, COVID-19 ruang ah tlunkal khenkham a si tik ah Hakha ah sianghleirun a kai lio mi Paletwa in minung 30 fai an umnak khua ah kir kho lo. A bik in, Chin Christian University (CCU), Hakha College (HC) le Government Technological Insititue (GTI) ah an kai mi hna an si. CCU a kaimi chung in a kir manh lomi hi minung 10 tluk an si nain, sianginn tawlrel piaknak in zohkhentu chungkhar (host family) an kawl piak hna nain cozah sianginn kaimi 20 fai hi inn 4 hlan in an um tiah theih a si.
Paletwa in Hakha ah sianghleirun a rak kaimi hi Paletwa Students Family (Hakha) tiah phu an i dirh i, Peletwa ralzaam hna caah Coffee night, Motorcycle tawlnak tbk. in tangka kawlnak a zong an rak tuah. Atu ah, Hakha ah a ummi siangnakchia nih 2017 min cazin khomhsuatnak an tuahmi ning in, Cozah, NGOs riantuan le siangnakchia tiah zapi fonh minung 200 fai an si i, cuchung ah sianghleikai lio mi hi 30 fai an si tiah theih a si.
Atu ah bawmhnak a rak petu hna Hakha High School ah sianginn a rak kaimi hawikom rual hi atu ahcun USA ram hmun kip Indiana, DC, Maryland, tbk. ah a um cangmi an si tiah kan theih. #
About The Author
