Van Bawi Hmun; Chin Ramkulh Chung In Paih A Ka Tei Ding Ka Hmu Rih Hna Lo
Salai Cung Cung |2019 February 18| Kan Laimi Chin ramkulh chung in paih a ka tei tu ding hi tu tiang ah cun ka hmu rih hna lo tiah Chinland Paih Championship (CPC) Champion Van Bawi Hmun nih a chim.
“Tukum 71nak Chin Miphun Ni ah kaa paih le paih lo ding a fiang rih lo. Tu hi Paih training kan tuahnak ah ka tai kaa hrawh le Paih cu ka duh ngai ko. A hlan ah cun ka rak i pai bal lo, CPC nih tuahmi ah khan a voikhatnak kaa paih a si. Tu lio hi ka tai kaa hrawh hnu in zarkhat leng training ka tuah kho ti lo. Ka tai hna a vun dam deuh ah cun tukum Chin Miphun Ni ah hin azapi in zatlang he zuamcawh he i pai ding in timh tuahnak ka ngei. Tukum Chin Miphun Ni Paih Champion cu zuamcawh ka luh ah cun kaa ruah chih ko nain ngah le ngah lo cu Pathian thawng a si te lai” tiah Van Bawi Hmun nih The Chinland Post ah a chim.
“Chin ramkulh chung ah Paih ding in ka tihmi an um lo. Tu tiang ah Hakha le Chin ramkulh dirhmun in an i paih mi ka zoh tikah a ka tei kho ding ka hmu rih hna lo. Cucaah kaa paih ah cun Champion cu keimah ta a si ko lai ti kan ruah. Kanmah Senthang zong Club dir kan i tim i aa paih ding hi minung 7 hrawng kan i thim. Senthang chung in paih ah a zapah ko ka timi hi minung 2 an si. Pakhatnak ah Thawng Awi Sang le Lian Thawng Hnin an si” tiah a chim chap.
Hika ah Van Bawi Hmun nih champion a ngahnak video zoh khawh a si.
Van Bawi Hmun hi Hakha peng, Sakta a si. A pa min Pu Khua Hram le anu min Pi Tha Men an si. Chungkhar unau pa 6 lakah a hniagbik chang a si. A kum 26, a san pe 6 le letma 2, a pound 205 a si tiah kan theih.
