Vanlei kahdohnak ral ṭihnung ruang ah Thantlang peng sianginn nicaan rikhiah um lo in an khar
The Chinland Post | 2023 January 17 – Chin ramkulh, Thantlang peng cu SAC nih vanlei kahdohnak ral ṭihnung ruang ah January 16 thok in sianginn pawl nicaan rikhiah um lo in an khar tiah Thantlang mipi uknak phu i fimcawnnak zung sin in thawng theih a si.
“Kan zapi nih an theih bantuk in SAC cu sualnak a tuah tik ah sianginn, mipi he aa naihniamnak hmunhma pawl zong ngan lo in bom a thlak caah, Camp Victoria doh a ton hnu ah vanlawng pawl an rak zuang lengmang caah a him ti lo tiah kan ruah i sianginn kan kharnak hi a si” tiah Public Administration, Thantlang Education Department rianngeitu Salai Cross Thang nih Khonumthung Burmese ah a chim.
Sianginn khar caan chung ah mipi hna nih sianginn tual chung ah lente celh lo ding, nuamhnak tuah lo ding le a bu in um lo ding tiah Public Administration, Thantlang Education Department nih ralrinnak a thanh.
A luancia January 10 le 11 ah Thantlang peng chung ah a um mi CNF Headquarters, Camp Victoria, cu SAC nih kahdohnak vanlawng in nihnih chung bom a rak thlak. Cubantuk in bom a thlak hnu ah SAC vanlawng pawl Thantlang peng ah an rak zuang ṭhan lengmang caah vanlei kahdohnak a um ṭhan sual lai tiah an lungre a thei.
Thantlang peng ah mipi uknak phu nih an dirh mi sianginn 95 ah um i siahngakchia 15,000 leng hrawng an si leng ah sianginn a kai a za cang mi hngakchia chung in 90% hrawng nih sianginn an kai kho tiah theih a si.
Photo – TCJ
About The Author
