Vawlei Dawt Lo Cu Minung Hawi Dawt Lo He Aa Khat

Pu Khua Kung| 2019 May 20| Vawleicung ramhme, ramngan, sifak, mirum a kan cawmtu cu kan umnak cio vawlei hi a si. Vawlei hin miphun kip an rum, an lianhngannak an thanchonak a hrambik zong a si fawn. A  kan fimhlawmtu zong a si rih. Vawlei a daw i a hmangthiammi ram minung cu kumkhat hnu kumkhat huham limhang an ngei chin.

Ramdang nih a theipar an tlanh ti cu hngalh ciomi a si ko. Leicung leitang chuak ram minung caah hmang lo in mah pumpak eihmuarnak lawng ruat in a hmangmi cozah cu chuklei panh in sifah le thangchiat he ram minung uktu zong an um len ve. Pathian nih minung hi vawlei hmangtu ding ah a kan ser. Leicung leitang chuak thirli hin an paw i cawm hna seh tiah aa ruang aa tlunte in a sermi vanruah nika thlitu, a ceu, a mui mi hi thleidanglo te in a kan pek ciomi a si.

Nain a sermi minung hi zeilei paoh in i tluk, i tia, i khat, i ruang dih in kan ser sehlaw vawlei hi a hmun ti hnga lo. Mifim mithiam mithawng mirum an um bang mihrut santlailo sifak um ruang ah hin nihin tiang vawlei a hmun rih. Hihi Pathian duhning a rak si. Mifim mithiam a umter nak cu vawlei le a cung um minung hi uktu hruaitu um i vawlei le minung i daw, i remte in khuasa hna seh tinak a rak si. Cu bantuk in vawleipi hi uktu cozah nih ukhruai i a dingte le remte in a umter mi hna lakah kan Chinram sifakbik te zong hi aa tel vemi ram kan si ve. Sifak bik ram kan sinak a ruang kan chim ti lai lo.

Tawngkhawn hramhram chawlol uknak in zaukphung dik uknak ah mee pek in thimmi MP kan ngei cio dih cang. Ram palai an si. Mee a petu sin ah hluttaw i an khuakhannak an hmuhtonmi kha chimfiannak ngei tawn hna sehlaw khua le sang nih an herhbaunak an chimrelmi vialte kha hluttaw tonpumhnak ah chimrel awk tampi an ngei lai. Hal duhmi zong an hal khawh lai. An chungkhar an tappi le an lungthu hmun cun chimrel awk hal awk mizapi caah an ngei kho bal lai lo. Ramvai bal lomi nih sa an kap bal lo. Mi ralchia nih sahrang sapi puam an kap ngam bal ve lo. Mee a petu hna hi anmah tluk in a fim le zaapi zawnruat tu ong an um ko lai.

Pu Khua Kung/ Photo: The Chinland Post

Kan Chinram ah company tampi nih rian an kan tuanpiak, a thangthami, a felmi khua zawnruat in a tuanmi an um bang amiak tampi hmuh lawng ruat in khuami zawnruat lo a thangchiami company an um len ve. Mah hna kong zong cu an tappi le an umhmun cun theih le hngalh khawh a si hin hnga maw? Ruat deuh cang hna sehlaw kan fingtlang vawlei nelrawn a himnak a rawhnak zong an hngalh khawh ve lai. Kan zatlang lam ah an mui a de hin ti lo. Fingtlang kip kal le zoh fial an si lo. A minung hawi mee petu sin ah naihniam te in thutdir ti i, ihawikomhnak nih vawlei le minung dawtremnak le thanchonak a chuahpi titu hi langhter ka duhmi a si.

A cunglei ah ka chim cang bang in company riantuantu hna cu an riantuan dih tuan le amiak zeizat ti lawng a tuakmi an si. hmailei minung caah sungh rawhralnak a si lai ti zawnruahnak a ngeimi an si lem lo. Vawlei an dawt ruang ah Chin cozah nih an hrawhter thanmi le a thar in an tuanter thanmi an um len cang.

Vawlei le minung an dawtlonak a si cu mu. Chim le tial ka duhnak a ruangbik cu Hakha Post Chief Editor nih keivaangzuan lunglaaknak a tialmi ka rel ka thling a kik colh. Aize! Zeidah kan can hoi lai cu lung a tor. Cimh le tolh hi Halkha khaulipi he kawidua ah can sual lai ka phang tuk. Kan pipu hna nih Halkha an tlaknak in kum 600 deng a si cangmi Rungtlang pi a cimh nak zong cu minung nih vawlei kan dawtlonak a ruang theu a si ko. Mirang record ah a rak um cangmi Rungtlang pi a cimh cu Chinram lawng si lo in Kawlram in vawleipi a hnintu mimcimh a si.

Kawlram in thawngzamhtu media Kawlnu ka sin ah Khuathar kan um lio ah a ra. Rungtlang a cimhnak a ruang a ka hal. Ka lehnak cu a tawinak te in Rungtlang a tawlei a khomi thinkung an hau. A cunglei in palek umnak ah theng in thinkung le lung a nganpipi vawlei tlaitu an cawh an phur dih caah Rungtlang a cimhnak hi a si ka ti. Pathian sermi thil paoh hi a hmunh a fehnak caah pakhat le pakhat hi an i pehtlai cio dih. Mah cu thial, laak le hrawh ahcun an rawh an cimh, an tolh phung a si ko.

Vawlei le minung dawt lo ruang theu a dik ko. Hi keivaangzuan lam zong cu a cimhtolh i harnak nganpi ton lai, mitthlam ah hei cuanter cio ahcun cozah lamzunglei an si ah company an si ah hnuhhmai ruat te in a hlankan in tuahtuan ahcun mitthlam cuang cio mi harnak hi kan hrial khawh ko lai ti ka zumh.

Atu lio cozah le cozah riantuantu nih vawlei an dawt i lungding lungthiang te in kaadang hmun zong ah an tuan ahcun vawlei dawt lawng si lo in minung an dawtnak a si caah vawlei minung sungh zatlaknak kan tong hraw lai lo. Vawlei dawtlo cu minung hawi dawtlo he aa khat ko ti hi kan philh lo awk a si ko.

Catialtu:

Pu Khua Kung

Hakha Khuahlun

Biakilh: Hi cabia cu catialtu pumpak hmuhning a si. 

Leave a Commnet

%d bloggers like this: