Vawlei pumpi in ralzaam 100 millions an phan, Myanmar ram ah 1 million hrawng an um
The Chinland Post | 2022 May 24 – Vawlei pumpi ah inn le lo kaltak in a zaami mi 100 millions leng an si tiah UN nih May 23 ah a thanh.
Buainak pawl, hramhram thiltuahnak pawl, nuhrin covo buarnak pawl le hremnak chung in a zaammi cazin 100 millions an phanh hi a voikhatnak bik a si tiah United Nations Officer for the Coordination of Humanitarian Affairs (UNOCHA) canthanhnak ah an langhter.
Myanmar ram telh in Africanistan, Burkina Faso, Congo, Ethiopia le Nigeria ram hna ah inn le lo a zaamtakmi hi 2021 kum dongh tiangah 90 millions an phan tiah a langhter.
Cun 2022 kum hramthok in Ukraine-Russia raltuknak ruangah 14 millions nih inn le lo an zaamtak.
Myanmar ram ah SAC nih hramhram in uknak a lak hnu kum khat leng caan chungah ralzaam thar 590,100 tiang an i chap tiah UNOCHA nih 2022 May thla thok a report ah a langhter.
A hlan ah a rak um cia cangmi ralzaam 346,600 he fonh a si ahcun a tulio Myanmar ram ah ralzaam 936,700 leng an phan tiah a langhter.
Hriamtlaih buainak a fah khunnak Chin, Magway le Sagaing ramṭhen hna ah ralzaam thar 330,000 leng an a tambik an i chap i a tangmi cu Karen, Kayah, Shan, Mon, Taninthary le Bago ramṭhen hna in an si.
100 millions a lonhmi vawlei pumpi ralzaam kan zoh a si ahcun ṭih a nung tuk i, buainak dihter zok a hau tiah UN nih a chim.
