Vawlei ralpi pathumnak aa thok cang tiah Russia TV program nih a thanh
The Chinland Post | 2022 April 18 – Russia ram cu NATO phu he i ralchanh in vawlei ralpi pathumnak chungah a lut cang. Cucaah President Vladimir Putin i “Special Operation” a caan a sau khunnak a ruang a si tiah Russia nih a ngeihmi TV program biachimtu nih a thanh.
Russia rili ralkap phu i a biapi bik raltuknak tinbaw a simi Moskva a pil i Moscow caah a fak tukmi sunghnak pakhat a chuahter hnu ah Russia i a larbik TV program biachimtu nih a chimmi hi a si.
Russia cu a tulio caan ah, NATO phu i a biapimi inn pawl a tuk cang timi thawngpang hi cohlanding ah Rossiya 1 TV program biachimtu Olga Akabeyeva nih a chim.
“Ukraine Operation hi rang deuh in tuah khawh a si lo ma?” tiah mi tampi nih an chim. Mi zapi nih rang tein siseh ti an duh cio. A tlingmi teinak kha zapi nih duh cio a si ko lai. Kan i tinhmi tamtlinh cu zapi nih duh a si ko lai” tiah a chim.
“Cuti si lo ahcun, Ukraine ah kan thokmi Operation hi cohlan awk a tha hnga lo” tiah a peh.
“Vawlei ralpi pathumnak kan phan cang ti cu mi pakhat nih hnangam tein chim khawh a si. A fiang tukmi a si” tiah TV program biachimtu nih cun a langhrer.
“NATO phu i a biapi mi inn pawl kan kah hrim hrim ko. Ccaah, mipi hna nih kan cohlan a hau”.
Pe 610 a saumi Moskva raltuknak tinbaw cu a luancia April 14 ah tiva kam dawh a si lio ah a pil tiah Russia Ministry of Defense nih a chim.
Tinbaw cungah mei a kaang i kuanzen a puak tiah Russia Ministry of Defense nih a chim ko nain Ukraine nih cun kan mah nih kan kahmi hriamngan nih a a khen tiah a chim ve.
About The Author
