Vawlei Tang Bomb Chiahmi Aa Lamh Sual Caah Pu Hoih Thang Sii-inn A Phan
Hakha TCP |2018 October 31| Chin ramkulh, Paletwa um Pu Hoih Thang kum 35 cu October 29 ah vawilei tang Bomb a lamh sual i fak ngai in aa khawn caah Rakhine ramkulh khualipi Sittwe Sii-inn ah an kal pi tiah kan theih.
“Sittwe Sii-inn ah October 29 zing in an kal pi tiah ka theih. Aa khawnmi a fah tuk caah thinphan a um ko” tiah Paletwa peng mizaw bawmhnak Bu in Ko Kyaw nih a chim.
Pu Hoih Thang le a hawile 4 cu October 23 ahkhan meh kawl dingin ramtang ah an kal i zahan zingka 11:00am ah bomb aa lamh sual hi si. A hawile 4 nih khuami sinah thawng an thanh i zanlei 4:00pm hrawng ah khua an phanhpi. Zaa 6:00pm ah an khua in Paletwa khuapi sii-inn ah an kalpi. Zaan khuadei an kal i tu zingka 5:00am ah Rakhine ramkulh khualipi a simi Sittwe sii-inn an phakpi. Atu hi Sittwe sii-inn ah an thlopbul cuahmah liopi a si tiah kan theih.
Pu Hoih Thang le a hawi pa 5 cu ramlak ah mehhang an kawl i an tlunlei ah vawilei tang bomb aa lamh sual hi a si. Ahmai rawk, a kehlei kutdong pawl le a vorhlei ke aa hliam, a haa cung he tang he 4 an kiak, a zunzunnak aa hliam.
Pu Hoih Thang hi fa 5 a ngeimi le Yat Chaung khuami a si. Aa hliam ning a fah tuk caah Sittwe sizung ah kalpi a hau nain tangka an ngei lo. Paletwa peng ahhin kum 2015 thokin Rakhine Ralkap (AA) le cozah ralkap (Kawl Ralkap) an i kap lengmang i khuami 6,000 leng an zaam cang.
A luancia September 20 zong ah khan Paletwa pengah ramtang vawilei bomh lamh sual in nu pakhat zong a rak thi bal cang tiah kan theih.
Ref: Khonumthung, Chin World
About The Author
