Vawleicung Ram Nuam Bik Finland, Denmark le Norway An Si; Australia 10nk le US 19nk An Si

0

Salai Lian| 2019 June 17 | Vawleicung ah Scandinavian ram pawl hi um a nuam biknak an si timi hi a dikfel chin thluahmah ko cang. Atu kum 2019 Vawlei Nuamnak Ripawt nih Nordic ram nih pakhtnak in panga nak tiang an tlaih.

Filand ram nih kum hnih khengte pakhatnak a tlaih cang. Denmark nih pahnihnak, 2017 ah pakhatnak simi Norway pathumnak le Iceland tiah an hun i zul duahmah. The Netherlands ram zong a cunglei panganak ah aa tel. Cu hnu ceo ahcun, Switzerland, Sweden, New Zealand, Canada le Australia tbk. cu a cunglei bik 10 chung ah a telmi ram an hung si.

US hi 19nk lawng a si, 2018 ah 18 nak a si nain dot khat a tanglei ah a tla. UK hi 15nk a si, US cu a tei.

Singapore hi 34nk a si i, Thailand hi 52nk a si nain, Malaysia cu 80nk lawng a si. Cun, vawleicung ah thanchonak a rang bik an timi Tuluk (China) hi 93nk a si i, India 140nk lawng a phan. Kawlram nih a tei hna; Kawlram hi anmah tahfung ning in 131nk a phan. A dihlak in vawleicung a nuamhnak ram tahnak nih a langhtermi hi ram 156 a si.

A tanglei bik in Yemen 151nk, Rwanda 152nk, Tanzania 153nk, Afghanistan 154nk le ramchung raldohnak a um cuahmahmi hna Central African republic nih 155 nak le South Sudan nih 156nk a nuamhlo bik sinak an tlaih.

Ramchung ral thawhnak nih hin ram mizapi thinphang le thlalau in a umter hna i nuamhlonak a chuahter timi hi an ripawt nih a langhtermi pakhat a si.

Cun, Tangka nih Nuamhnak hi a caw kho lo.

Vawleicung ram nuam tahnak hi a bik in tahfung phun 6 in an zoh; Rampi tangka luhchuah ning GDP le pumpak thlahlawh (GDP per capita); cozah zokhenhnak (social support); nunkhua sau le tawi (life expectancy), zalong tein nunnak kong ah biakhiahnak nawl (freedom to make life choices), siannak (generosity); le ziknawh eihmurnak (corruption levels) hna an si.

Hi chung vialte ahhin, Finland nih a tlamtlinh bik i a hlei khun in siannak ahhin an thawng tuk tiah hlaithlainak ah an hmuh. Hlathlainak a tuahtu hna nih mi bawmhnak nih lawmnak a chuahter an ti. Finland ram mi tam deuh hna hi caanhman tein mi bawmhnak an pek lawng silo in zaanghleicawi in mi an bawm lengmang timi an hmuhchuah.

Vawleicung nuamnak tahnak ripawt ning in mizapi le cozah pehtlaihnak a that deuhnak poahpoah ah nuamhnak a um deuh. Cucu, nuamhnak a um deuhnak poahpoah ah cozah thimfung thlak tik ah a chuakmi an tam deuh tiah an ti. Ramkhel ruang ah i zumhlonak le zatlang ah izumhlonak nih mizapi nuamhnak hi a hnursuan i a tlawmter deuh tiah an hmuhmi zong a si.

Cun, cozah hrimrhim hi ram mizapi an i nuamhnak ah ah mawhphurhnak rian ngan bik a ngeimi an si. A hlei in, ziknawh eihmur doh, mizapi buaibailo ding in chiah le ram mi caah zohkhennak tha tein pekkhawhnak hi a biapi tukmi an si. Cucu, cozah nih zei zong vialte khenkham dih le hrimhrim in uk (control) dih silo in, pumpak zalonnak pek thiam zong hi a biapi tukmi a si fawn. Tangka hi i nuamhnak caah bawmchantu cu a si ko, nain tangka lawnglawng nih nuamnak hi a caw kho lo timi hi 2019 World Happiness Report nih an hmuhchuahmi a si.

Ref: https://www.weforum.org/agenda/2019/03/finland-is-the-world-s-happiest-country-again?fbclid=IwAR1epgeSTPsdkux_RxY9YA18k1frZnD-BKGEmRmvoQ9QrfO7sVZuiJXuRh4

About The Author

Na ruahning rak langhter ve.. (Leave a comment)

%d bloggers like this: