Vice President Henry Van Thio Aa Din Lai Timi Hi Thawngpang Diklo A Si

Tawk Tling Thang| 2019 January 29| Vice President Henry Van Thio a rian in aa din lai timi cu thawngpang diklo a si lo tiah Naypyidaw in cozah riantuantu upa pakhat nih The Chinland Post ah a chim.

Lai media cheukhat nih online ah Vice President Henry Van Thio a rian in aa din lai tiah cherhchan fek ngei huaha lo in an thanh. Cu lawng si lo in Kawl media pakhat a simi Tommorrow Journal zong nih Vice President Henry Van Thio asilole Vice President U Myint Swe hi pakhat chingchang an rian in an i din lai tiah a tial ve. Cu ruang ah ramchung ramleng Chin miphun cheukhat cu an khuaruah a har i an lau ngaingai tiah kan theih.

Hi kong he pehtlai in Kawl media bochan awktlakmi BBC, RFA, DVB, 7Day, Eleven, Mizzima tibantuk le cozah ngeihmi New Light of Myanmar, The Mirror tibantuk media pawl nih zeihmanh thawngpang an tial lo. Cu ruang ah The Chinland Post nih a diklomi thawngpang a si ti kan ruah caah kan tial duh lo. Asinain, social media cakuang ah thawngpang diklo nih hmunhma tampi a laak caah atu bantuk in thawngpang dik careltu mizapi sin ah kan hun langhter.

Hi kong he pehtlai in Naypyidaw ah cozah riantuantu Chin upa pakhat cu The Chinland Post nih pehtlaihnak kan tuah i atu bantuk in a kan leh. Amah hi Vice President Henry Van Thio he aa naihniam ngaimi pakhat zong a si.

“Vice President Henry Van Thio a rian in aa din lai timi cu thawngpang diklo a si. Ramkhel tuah duhmi le social media cahmai kaupi in laak a duhmi pawl nih lih le hrokhrol in an tialmi a si. Vice President a rian in aa din lai timi thawngpang cu Chin miphun nih rak i zumh hrimhrim hna hlah seh. A dik bak lomi a si. Hi kong cu Vice President zong nih a theih ve i a nihchuah bantuk in kapkhat lei in a ngaih zong a chia lei. Zei ruang ah ti ahcun amah dohkalhtu hna nih an namnehnak le ramkhel lente an celhpi mi a si caah a si” tiah The Chinland Post ah a chim.

Hi kong thiam he pehtlai in Yangon khuasa Vice President he aa naihniammi upa pakhat nih, “Vice President Henry Van Thio aiawh ah Yangon ramthen Chief Minister U Phyo Min Thein le Mandalay ramthen Chief Minister Dr. Zaw Myint Maung min cazin Daw Aung San Suu Kyi sin ah chuahpi i pakhat paoh kha Vice President caah hluttaw ah chuahpi a si lai tiah thawng vakvuain a chuakmi zong hi thawngpang diklo a si. Hiti thawngpang diklo a vahpitu hna hi Pu Henry Van Thio a duhlotu le U Phyo Min Thein thapetu pawl an si lai. Atu lawng si lo in vice president a tuanka in biaknak kong zong ah thawng diklo in sual an rak phawt bal cang. Hi bantuk tete in hmailei zong ah a ton cuahmah rih khawh, rak i zumh hlah usih. Thawngpang zong vahter chin hlah usih” tiah The Chinland Post ah a chim.

Vice President Henry Van Thio a ngandam lonak ruang ah a rian in aa din lai timi thawngpang a chuakmi hi a dik bak lomi a si. Aa din lai lo, kum 5 chung caantling te in rampi rian a tuan ko lai tiah Chin ramkulh Chief Minister Salai Lian Luai le Chin ramkulh hluttaw Speaker sin in kan theih fawn.

Myanmar rampi President, Vice President, ramkomh minister le hluttaw speaker kong ah siseh, atu bantuk in hmailei zong ah thil a cang lengmang rih lai. Cucaah, hi bantuk thawngpang kong ah Online catialtu Chin mi vialte nih fimkhur te in ca kan tial le kan i ralrin taktak a herh.

Online ah thanhmi le tialmi paoh kan i zumh dih awk asi lo. Kawl media nih an tial ko ti phun in kan leh colh awk le mizapi sin ah kan thanh colh awk a si lo. Hi bantuk kong a si ahcun Kawl media bochan awktlakmi BBC, RFA, DVB, 7Day, Eleven, Mizzima tibantuk le cozah ngeihmi New Light of Myanmar, The Mirror tibantuk media pawl nih an tial le tial lo zohta hmasa a herh. Thawngpang kan leh tikah kan leh dingmi ca a tialtu le a thanhtu media kha bochan awk a tlakmi a si le si lo fimkhurte in zoh le ngiat a herh.

Cu bantuk in Chin mizapi zong nih Online (facebook le website) cathanh mi le ca an thlahmi paoh kan i zumh dih awk a si lo. Hi cathhlahtu le thanhtu media hi bochan awk a tlakmi media le catialtu a si maw si lo timi nan kan zohfel thiam le facang mu thim zia nan kan thiam ding a biapi tuk ve cang.

Cucaah, catialtu siseh, careltu lila zong nih siseh, fimkhur te in ca kan tial lo le kan rel lo ahcun kanmah le kanmah kan i hleng dih cang lai, kan i zuar dih cang lai. Careltu ngeihnak a si paoh ahcun tiah catial a hmangmi media paoh careltu nih fimkhur te in kan hrial cang uh. A herh ahcun rel lo ding, kau lo ding le zumh lo dingmi black list media cazin i chiah cang hna usih. Cu bantuk in a dik maw diklo timi fianhternak (verification) tuahnak caah bochanmi le zumhtlakmi media zong i chiahchih fawn cang hna usih. Hihi a biapi tuk cang.

Chin media tampi lakah hin mi zeidah, zei bantuk media phu dah hurduhcuai kong, thawngpang diklo kong, zumhawk tlaklomi thawngpang kong tial a hmang. Cun, mi zei dah media ethic le zulhphung buar in catial le cathanh a hmangmi an si timi kan sum kan tahthiam cang uh. Cu lo ahcun a rang tukmi social media (lai media tete) nih an in hlen in an in zuar dih cang hna lai.

Cucaah, catialtu he careltu he media (catial, cathlah) hi Chin miphun nih fimkhur te le ralring te in hmanthiam khawh i zuam cio cang hna usih.

Leave a Commnet

%d bloggers like this: