Vice President Henry Van Thio Chin Ram A Rak Tlawng Lai, Ramkomh Cozah Nih A Tuahmi Zohfel Din Ah
City Hunter| 2018 January 30| Vice President Henry Van Thio cu ramkomh cozah nih a tuanchuahmi Chinram chung ramkomh lampi zohfel ah Chin ramkulh tlawn aa tim tiah thawng kan theih.
Vice President Henry Van Thio nih Chinram tlawn aa timhnak kong he pehtlai in Chin ramkulh upadi bawizik Pu Sonny Thang Cung nih The Chinland Post ah a chim.
“Vice President Henry VanThio cu arauh hlan ah Chinram a rak kan tlawng lai. Amah lawng si lo in ramkomh minister pali hrawng le ramkomh cozah zung in Director, Deputy Director hna zong nih an rak zulh lai. Tutan Chinram tlawn aa timhnak a ruang bik cu, ramkomh cozah nih Chinram chung lam le sul a tuanchuahmi ramkomh lampi zohfel hi a si. Cucaah, lam le sul tuahmi zohfel khawhnak ding ah Kalay-Hakha tiang hi motor in a rak tlung lai i Hakha ah zankhat a riak lai. Cu bantuk in Hakha-Thantlang, Hnaring, Matupi, Mindat-Kanpetlet tibantuk khuallam vialte zong motor lawngte in a tlawng lai. Hakha le Thantlang ah zankhat veve a riak lai.”
“Tutan Chinram a rak tlawn ah India-Myanmar ramri pehtlaihnak ramkomh lampi pakhat a simi Saisihchuak lampi zong a zoh lai. Cun, Tikir khua a phan lai i Tikir Dam tuahmi zong zohfelnak a tuah lai. A khuallam hi a tlangpi cun, Kalay-Hakha, Hakha-Thantlang, Thantlang-Hnaring, Hnaring-Matupi, Matupi in Kanpetlet, Mindat tiang motor in a tlawng lai” tiah Pu Sonny Thang Cung nih a biapeh ah a chim.
Vice President hi zeitik dah Hakha phak lai timi hi Chinram cozah bu le upa cheukhat kan hal hna nain fiangte in an chim lo. February zarhkhatnak ti lawng an kan chimh. Asinain cozah zung cheukhat riantuantu hna chimning cun February 2 zan Hakha riah i February 3 ah Hakha in Thantlang lei lanh dawh a si tiah kan theih.
Tutan Vice President Henry Van Thio Chinram a tlawn hi Vice President rian a tuan hnu in avoi hnihnak a tlawn a si lai tiah kan theih. +++
About The Author
