Vice President Henry Van Thio Chinram Khuallam He Kalay A Cawlcanghnak
City Hunter| 2018 May 18| Myanmar rampi Vice President Henry Van Thio le ramkomh minisrty zung in tuanvo ngeitu hna cu Chinram tlawn khuallam he May 16 ah Sagaing ramthen Kalay ah an phan. Kalay i nikhat a caam chung a cawlcanghnak pawl cu a tanglei bantuk in a si.
1. Vice President Henry Van Thio nih, kokek ralvennak caah hmailei caansau riantuan dingmi le a kum hoih in budget hmanning kong, lakhruak in kokek ralvennak rian tuanning le kokkek ral caah chiahmi budget in cunglei (keimah sin) ah halnak tuah in nan hman lai. Cuti rian tuanchuahnak le budget nan hman tikah mizapi caah man ngeite le sullam ngeite he ningcangte in nan tawlrel lai” tiah a forhfial hna.
2. Vice President Henry Van Thio le a zultu hna nih Kalay Phaungku hlei pawng tiva vampang (retaining wall) an sakmi dirhmun a zohfel. Cu Phawngku hlei pawng tiva vampang chawnmi cu 2017-18 budget kum chung ah ks. nuai 264 in an sak.
3. Vice President Henry Van Thio nih Kalay-Kalewa motor lamkam Myit-tha tiva kam retaining wall an sakmi zong zohfelnak a ngeih dih. Kalay-Kalewa motor lam cim lo ding in runvennak rian caah pe 5100 a simi Myit-tha retaining wall cu 2018 kum thlaruk budget caah ks. nuai 2200 in an sak i zatuak 60% tluk an lim cang tiah theih a si.
4. Kalay khuapi chung Mizapi Rianbawmhnak zung ah a kal i an riantuanmi zohfelnak a ngeih i tualchung mizapi thapeknak a ngeih hna.
5. Sagaing ramthen chung ah a ummi ralkap nih hramhram in hmun rak chuhmi ekah 1600 renglo cu vawlei hmun ngeitu mizapi sin ah Vice President Henry Van Thio nih May 16 ah a ap than hna i ekah 4800 renglo cu rampi cozah sin ah a ap. Vawlei hmun chuhmi pek thanmi cu; Sagaing ramthen chung, Kah-thar pengkomh, Kant-balu pengkomh, Shwebo pengkomh an si. ralkap nih hmun rak chuhmi lei hmun cu hmun ngeitu sin ah caankarlak (temporary) vawlei tuah/thlawhnak nawl card pungsan 3 chuahpiaknak le vawlei hmun lawngmi pawl rampi cozah sin apnak cu May 16, Kant-balu khuapi Shwe-see Maing hall ah an tuah.
Vice President Henry Van Thio le a hnuzultu cu May 16 zingka Naypyidaw in an rak i thawh i Kalay ah an ra. Chin ramkulh Chief Minister telh in cozah bu le Sagaing ramthen Chief Minister telh in cozah bu upa hna nih an don hna. May 16 cu Sagaing ramthen chung ah a caam i Kalay a riak. Cu dih hnu May 17 ah Kalay in Tonzang, Chikha ah an khuallam an pehzulh i Tonzang ah an riak.
May 18 ah Cikha, Tonzang in Tedim an phan than cang. May 18 cu Tedim- Rihkhawdar ah an kal i Rihkhawdar in Falam ah tuzan (May 18) zan hi an riak lai. May 19 ah Falam in Hakha ah a ra lai. Hakha in Gangaw lei a zohfel than lai i Gangaw in Naypyidaw lei ah a kir than te lai tiah kan theih.
Chinram chung, Tonzang, Cikha, Tedim, Rihkhawdar tibantuk a kalnak le a cawlcanghnak tial le thanh khawh kan hun i zuam than te lai.
Ref: President Office
About The Author
