Vice President Henry Van Thio Nih Chinram Lam Le Sul A Vehvat Than Lai
City Hunter| 2018 May 14| Myanmar rampi Vice President Henry Van Thio nih Chinram lam le sul vehvatnak a ngeih than lai. Tu thla 15-20 kar chung ah tlawn aa tim tiah thawng kan theih.
“Tuzarh chung ah Vice President Henry Van Thio Chinram lam le sul vehvat bak ah a rak tlung than lai. Zeitik a rak tlun lai cu fiang in hngalh khawh a si lo, May 15-20 kar hrawng ah a si kho. Tutan Kalay lei in a rak tlung lai i Cikha-Tonzang le Tedim kar pehtlaihnak lam le sul a zoh lai. Cun, Tedim-Rihkhawdar le Rihkhawdar in Falam pehtlaihnak lam le sul vial lawng hi a zoh lai. a donghnak bik ah Hakha ah a ra te lai” tiah Chin ramkulh cozah zung ah riantuantu pakhat nih The Chinland Post ah a chim.
“Tutan cu Tonzang le Tedim ah a riak kho men. Kalay in Tedim, Tedim in Tonzang-Cikha ah a kal lai. Cikha in Tedim le Rihkhawdar ah a kal lai. Rihkhawdar in Falam ah a rak kir than lai i Falam zong a riak kho men. Hmundang le pengdang cu a tlawng ti lai lo” tiah a biapeh ah a chimchih.
Vice President Henry Van Thio cu April thla thawkka ahkhan Chinram lam le sul vehvat ah tlun tlun ding in Chinram cozah tuanvo ngeitu thawng a rak thanh cang hna nain relremlonak ruang ah a rak tlung kho lo. Cu ruang ah tutan tlun a rak i timhnak hi a si. Ramkomh minister cheukhat le ramkomh cozah zung in Director cheukhat nih an rak zulh lai i Chin ram cozah bu nih Kalay in an don lai i a khuallam vialte an zulh ve te lai tiah kan theih.
Vice President Henry Van Thio nih 2018 February 3-7 tiang ramkomh minister pakhat, ramkomh deputy minister pathum, ramkomh cozah zungpi in General Director le Director tampi he Chinram lam le sul an rak vehvat. Cu lio iahmotor lawngte in khan 600 renglo Chinram lam le sul a vehvat. Kalay-Falam-Hakha-Thantlang, Saisihchuak lam- Tio, Tikir, Hnaring, Matupi, Mindat le Kanpetlet tiang a rak tlawng. Zei dangdang bawmhnak lawng si lo in a tlawnnak pengkip sii-inn ihkhun chappiaknak zong a ngeih hna tiah kan theih.
February thla a rak tlun lio ah pengkip sii-inn ihkhun chappiak ding in bia a kamh hna pin ah amah a rak zulhtu ministry zung pawl nih a dangdang bawmhnak cheukhat zong an pek hna tiah kan theih.
About The Author
