Vice President Henry Van Thio Nih Chinram Lam Le Sul A Vehvat Than Lai

0

City Hunter| 2018 April 20| Myanmar rampi Vice President Henry Van Thio nih Chinram lam le sul vehvatnak a ngeih than lai. Tutan cu a zoh rih lonak lam le sul a vehvat lai tiah Chin ramkulh Lam Le Sul Pehtlaihnak ministry zung in thawng kan theih.

“April thla thawkka ahkhan Vice President Henry Van Thio nih April thla chung ah Chinram lam le sul vehvat ah ka rak tlung than lai tiah thawng a kan thanh. Asinain atu cu zeihmanh a kan thanh than ti lo caah zeitik a tlun lai hi hngalh khawh a si rih lo. Tutan a rak tlun tikah Chinram hmunkip ah kal in a zohfel lai lo. Gangaw lam a zoh lai. Cikha-Tonzang le Tedim kar pehtlaihnak lam le sul a zoh lai. Cun, Tedim-Rihkhawdar le Rihkhawdar in Falam pehtlaihnak lam le sul vial lawng hi a zoh lai” tiah Chin ramkulh lam le sul pehtlaihnak minister Pu Sui Thio nih The Chinland Post ah a chim.

“Gangaw lam hi a zoh rih lo caah Gangaw lei in a rak tlung lai i Hakha ah riak lo in Falam ah a riak lai. Cun, Falam in Tonzang ah a riak than lai. Tonzang in Cikha ah a lan lai i Cikha in Tedim ah a kir lai i Tedim ah a riak lai. Tedim in Rihkhawdar ah a kal lai i Rihkhawdar le Falam pehtlaihnak lam le sul a vehvat than lai. Pengdang le hmundang cu a kal ti lai lo. Hi vial ceo hi a khuallam a si lai” tiah a biapeh ah a chimchih.

Vice President Henry Van Thio nih 2018 February 3-7 tiang ramkomh minister pakhat, ramkomh deputy minister pathum, ramkomh cozah zungpi in General Director le Director tampi he Chinram lam le sul an rak vehvat. Cu lio iahmotor lawngte in khan 600 renglo Chinram lam le sul a vehvat. Kalay-Falam-Hakha-Thantlang, Saisihchuak lam- Tio, Tikir, Hnaring, Matupi, Mindat le Kanpetlet tiang a rak tlawng. Zeidangdang bawmhnak lawng si lo in a tlawnnak pengkip sii-inn ihkhun chappiaknak zong a ngeih hna tiah kan theih.

About The Author

Na ruahning rak langhter ve.. (Leave a comment)

%d bloggers like this: