Vice President Henry Van Thio Nih Hakha Khuami He Biaruahnak Ah Hakhathar Kong I A Lungfahnak Kong A Chim

0

Vice President Henry Van Thio_ Hakha a cawlcanghnak

Salai Cung Cung|2018 May 19| Hakha Town Hall ah Myanmar ram Vice President Pu Henry Van Thio nih May 19 zan suimilam 7 ah Hakha khuanu khuapa le Chin ramkulh minister pawl tonnak a ngeih hna. Hi ton biaruahnak ngeih lio ah Hakhathar kat-ta-ya phah dingmi kong le Hakhathar dinti kong ah a ngaihchiatnak kong a chim tiah kan theih.

Hi tonpumhnak ah hin Vice President Pu Henry Van Thio nih hramthawk bik bia achim hnu ah Hakha Khuanu Khuapa lei in upa pakhat nih khua thanchonak ding thil halnak a ngei. Cu a halmi hna cu Chin ramkulh Hakha ah specialist Doctor le Hakhathar kat-ta-ya phahpiak ding, Science colledge le Hakha khuachung ah thing zuarnak, ma-ha-dat-aa line le ihkhun 500 cu Vice President sinah halnak an ngei. Hi tonpumhnak ah hin ramkulh minister cheukhat le company cheukhat nih an raintuan ning kong he pehtlai in chimfiannak an tuah.

Myanmar Vice President nih Hakha khuanu khuapa cu, “Hi khuanu khuapa thil halmi kong he pehtlai in pakhat te i ruahti tak ka duh mi cu Hakhathar kong hi a si. Hi Hakhathar kong he pehtlai in kei zong tlawmpal cu ka theihmi aum cang. Hi Kat-ta-ya lam kong he pehtlai in kei nih ka theihmi cu lam phahpiak ding kan timi hi kan hnu kum ah khan hi area cu Sinpi Area asi lo caah Sipin Budget in tuah awk a tha lo, cun khattalei ah le caankel budget nih a tlinh lo cu ruangah kan tuah kho ti lo ti kan theih. Cucaah hi pawl hi Sipin budget in tuah a ngah hnga lo maw zei paoh kaphnih i bawmh cio in tuanti ah cun kan hlawhatling deuh ko lai” tiah a leh hna.

“Zei paoh hi kanmah nih A in Z tiang tuahpiak ding hi cun zei tik hmanh ah asi kho lo mi asi. Cu caah nanmah nih tuah tuan hnu in kanmah bawmh awk a tha mi cu kan in bawmh hna lai. Abik in ti kong hi asi, ti kong ruah ah hin ka lungtha lo. Hakha khuazei kal paoh ah tiharnak kong lawngte ka theih i ka lungtha hrim lo. Hi kong hi tha tein kan ruah than tikah tamtuk phaisa a dihmi asi i tu tiang ah tlamtling tein nan ngah khawh rih lomi hi cu ka lung atha lo ngai” tiah Vice President Pu Henry Van Thio nih May 19 Hakha Town Hall zapi ton biaruahnak ah a chim.

Myanmar ram Vice President Pu Henry Van Thio cu May 19 suimilam 11:30 hrawng ah Hakha a phan i Hakha Vawlei Cim khamnak (cyclone Shelter) a zohfel, zaanglek celhnak College( science colledge) sak an timhnak hmun Haithlan ah a kal i akir pah in Hakha Sii-inn ( imaging complex) a zohfel, Sii- inn chungah mizaw pawl a zoh pin ah thazaang peknak le laksawng peknak a ngeih hna. May 19 zan tonpumhnak ah Hakha khuanu Khuapa le Chim ramkulh minister le zung riantuan tampi an ra kho.

Vice President Henry Van Thio le a hnuzultu hna cu May 20 ah Hakha in Gangaw lei ah an kir. Zokhua lam le Gangaw lam an zoh pah tiah kan theih.

About The Author

Na ruahning rak langhter ve.. (Leave a comment)

%d bloggers like this: