Vice President Henry Van Thio Nih Ralkap Nih Hmun Chuhmi Ekah 1600 Renglo Hmun Ngeitu Sin Ah A Ap Than Hna
City Hunter| 2018 May 17| Sagaing ramthen chung ah a ummi ralkap nih hramhram in hmun rak chuhmi ekah 1600 renglo cu vawlei hmun ngeitu mizapi sin ah Vice President Henry Van Thio nih May 16 ah a ap than hna i ekah 4800 renglo cu rampi cozah sin ah a ap.
Vice President Henry Van Thio nih atu bantuk in vawlei ngeitu sin ah hmun chuhmi ap thannak cu Chinram a tlawn pah in May 16 ah apnak a ngeih hna hi a si. Sagaing ramthen chung, Kah-thar pengkomh, Kant-balu pengkomh, Shwebo pengkomh ah ralkap nih hmun rak chuhmi lei hmun cu hmun ngeitu sin ah caankarlak (temporary) vawlei tuah/thlawhnak nawl card pungsan 3 chuahpiaknak le vawlei hmun lawngmi pawl rampi cozah sin apnak cu May 16, Kant-balu khuapi Shwe-see Maing hall ah an tuah.
Sagaing ramthen lothlo phu in Vice Chairman U Taan Win nih, “atu bantuk in vawlei hmun pek than kan si caah kan i lawm tuk, kan i nuam tuk. Asinain a ngah rih lomi lothlotu pawl nihcun annih vial an ngah, kannih vial kan ngah lo tiah an ti ko lai. A ngah rih lomi pawl zong nih kan ngah than te lai maw timi an i ruahchan. Zei paoh a si ah atu bantuk in kan sungh cangmi vawlei hmun kan ngah thanmi cung ah kan i lawm tuk” tiah a chim.
Vawlei hmun apnak tuahnak hmun hall chung ah a lut khomi Vicce President he ton ding a hngakmi lothlotu pawl cu an tam taktak. An ton khawh lo caah report tuahnak ca tu kha an pek i a cohlanpiak hna tiah DVB nih a thanh.
Sagaing ramthen Chief Minister Dr. Myint Naing nih, “Vawlei hmun ap rih lomi pawl zong vawlei ngeitu sin ah ap kho than ding in pehzulh in rian kan tuan lai” tiah a chim.
Hi vawlei hmun apnak ah Vice President Henry Van Thio, Rampi Runvennak ministry zung in deputy minister Bogyoke Myint New, Sagaing ramthen chief Minister Dr. Myint Naing le cozah bu, Sagaing ramthen hluttaw Speaker le MPs hna, ramkomh cozah in tuanvo ngeitu le zungkip upa hna, lothlotu hna le Sagiang ramthen in pengkomh kip vawlei lei hmun tawlreltu phu pawl an i tel kho.
Myanmar rampi Vice President Henry Van Thio le ramkomh cozah zung in riantuantu cheukhat cu atu hi Chinram ah an tlawn cuahmah lio a si. Tonzang, Cikha le Tedim hrawng ah an tlawn liopi a si tiah kan theih.
Ref: DVB Burmese
About The Author
