Vice President Henry Van Thio Nih Tial Cung Thang A Conglawmh I Biathlithup A Ruah

Tawk Tling Thang | 2019 March 12| March 8 zan, Yangon ah tuahmi One Championship-MMA i teinak a hmuhnak ah Salai Tial Cung Thang nih Vice President Henry Van Thio nih conglawmh upat peknak le a dangte in biathlithup ruahnak a ngeih tiah kan theih.

Hi kong he pehtlai in Salai Tial Cung Thang nih, “A si, one championship i teinak ka hmuh ah Naypyidaw ah Vice President Henry Van Thio he kanmah pahnihte lawng a dangte in biathlithup i ruahnak kan ngei. Thawng nan rak theih bantuk khan conglawmhpinak a ka ngeih taktak ko. Asinain, zei bantuk laksawng dah a ka pek i zei bantuk biathlithup dah a ka ruah timi cu chim awk a tha lo” tiah The Chinland Post ah a chim.

“Hakha ah nithum hrawng ka caam lai i Kalay lei in ka kir te lai. Kalay in Yangon, Yangon in US lei ah ka kir than te lai” tiah a biapeh ah a chimchih.

Salai Tial Cung Thang cu one championship-MMA i aa thuatmi ruang le teinak a hmuhmi ruang ah All Chin Society, Yangon le Chin National Front/Army (CNF/A) nih lawmhpinak roca an pek. Cun, Hakha a phak hnu ah Chin Youth Organization, Hakha zong nih conglawmh upatnak roca an pek ve tiah kan theih.

March 12 zingka ah Hakha a phan i minung 200 tluk nih Hakha khualuh hauka in sunglawi ngai in an don i Lai phung in khan (meng) 4 chung an puak. An puaknak hmun hi Henry Van Thio Parthlaam saknak khuacuanhnak in Hakha Khuathar- a tlunnak inn tiang a si. A chungle nih midongtu zapi ca he chun an thah. March 13 ah Khuathar sangmi nih chunthah, thlacamnak an ngeihpiak lai tiah kan theih.

Leave a Commnet

%d bloggers like this: