Vice President Henry Van Thio Tawlrelpiaknak Thawng In Hakha-Taungkhayan Lam An Chunh Cuahmah

0

City Hunter| 2018 January 25| Kawlram ramkomh Vice President Henry Van Thio tawlrelpiaknak thawng in Hakha-Taungkhayan lam cu Chin company pahnih nih an chunh cuahmah tiah kan theih.

Hakha-Taungkhayan lam

Hakha-Tiphul-Rinte, Haiphai-Hata le Taungkhayan lam chunhnak ding cu Kawlram Vice President Henry Van Thio tawlrelpiaknak thawng in budget a tla. Hi budget chung in Chin company pahnih nih khan (meng) 5 chung veve cawh ding in tender an ngah i atu hi an cawh cuahmah liopi a si.

Hi kong he pehtlai in tender a ngahtu Rung Family Company in Director Pu Chum Ling cu The Chinland Post nih pehtlaihnak kan tuah i atu bantuk in a chim.

“Hakha-Gangaw lam a rawh tik caan i Kawlrawn le Hakha pehtlaihnak ding cangkep lam caah Vice President Henry Van Thio tawlrelpiaknak thawng in Hakha-Tiphul-Taungkhayan lam chunhnak caah budget kan ngah. Atu hi Rung Family company le Daisy Chaing company nih ks. sing 2600 veve in khan (meng) 5 chung veve chunh ding in tender kan ngah. Tender ka ngahnak hi Rinte khuataw in Dong ral tiang khan 5 chung a si. Atu hi Rinte khuataw in Dong ral tiang khan 5 chung cu motor duh tawk in a kal kho cang. Ks. sing 2600 in tender ka ngahmi ah hin Yepun le luti luannak telhchih in lam hi pe 20 kau a si lai. Yepun le luti luannak cu kan tuah kho deuh rih lo” tiah Pu Chum Ling nih TCP ah a chim.

Hakha-Taungkhayan lam

“Hakha-Rinte in Haiphai le Taungkhayan lam hi Kawlrawn he i tlawnkainak lam lawng si lo in Hakha,Thantlang nih fawite in facang kan phorh khawhnak ding a tha bikmi lam a si lai. Tiphul le Rinpi kar lam hi lam hlun a si nain a hliap tuk i ti a tam caah lam a har deuh. Cun pe 12 lam lawng a si rih. Tiphul le Rinpi kar hi lung i phah kho colh sehlaw a tha” tiah a bia peh ah a chimchih.

Rung Family nih a chunhmi Dongral in Haiphai karlak khan 5 chung hi Daisy Chaing company nih a tuan cuahmah lio a si ve. Khan 2 chung hrawng cu a lim ve cang tiah kan theih. +++

About The Author

Na ruahning rak langhter ve.. (Leave a comment)

%d bloggers like this: