Vice President; Matupi In Sami-Paletwa Lam Hi Fur-Thal Hlan Kal Kho Ding In Kan Tuah Cuahmah
TCP-Hakha| 2019 April 30| Rampi Vice President Henry Van Thio nih Kanpetlet a tlawn lio ah Matupi in Sami-Paletwa pehtlaihnak lampi hi fur-thal hlan in zei bantuk khua caan paoh ah tlungkal kho ding in kan tuah cuahmah tiah a chim.
Cu bantuk in Paletwa ah Kaladan tiva tannak hlei zong 2020 kum ah lim ding in kan sak cuahmah. Kanpetlet in Makuiinno-Sami-Paletwa lam zong master strategy lam i ser ding in kan tawlrel cuahmah lio a si. Kan hlawh a tlin ahcun India ram bawmhnak in tuahmi Kaladan simanking he kan pehtlaihter lai i Myanmar ram thlenglei in thil a chuakmi paoh Seikphyo-Saw-Kanpetlet-Makuiino-Sami-Paletwa lampi thluan in India ram ah kan kuat khawh lai. Cu tikah khua thanchonak lawng si lo in Myanmar-India ramhnih chawlehthalnak le i bawmhchanhnak caah bawmchantu lampi pakhat ah a hung i chuah lai. Cu ruang ah cuti tuanchuah khawhnak rian cozah nih fakpi in kan i zuam cuahmah tiah a chim.
Tonzang-Tedim- Falam-Hakha-Matupi le Paletwa kar pehtlaihnak lampi hi ramkomh lampi tiah min bunh a si.
Aralaimi 2020 kum ah Surbung tlang vanlawng tual zong lim ding in kan sak cuahmah. A rauh hlan ah Lailenpi vanlawng tual zong sak ding in kan i tim. Rampi huap in thatnak a pe kho ding 622Megawatt a chuah khotu dingmi Laymyo tiva electric simanking zong pehzulh in kan tuan cuahmah tiah a chim.
Naite ah peng pek tharmi Cindwe khua zong Vice President cu a va phan. Kanpetlet-Cindwe pehtlaihnak lam chunh dingmi zong tuanvo ngeitu hna nih fianternak an tuah. Thura Lynn Construction Company nih ks. nuai 250 in Kanpetlet Zaanglekcelhnak Hall 2019 September 30 ah lim ding in a sak liomi a zoh. Kanpetlet ihkhun 50 sii-inn a zoh i riantuantu pawl a herhmi a chimh dih hna hnu ah sii-inn mizaw thazaang peknak le laksawng peknak a ngeih hna. Kanpetlet sii-inn dothnih sak chap dingmi hmunhma zong a zoh tiah kan theih.
