Vice President Pu Henry Van Thio Nih Webula Khua Myo Pek Mi Le High School Sianginn Hunnak A Tuah Lai
Salai Elvis| September 27| Kawlram ramkomh Vice President II Pu Henry Van Thio nih Falam peng Webula khua myo pekmi le High School sianginn cu September 30 zinglei suimilam 8:00 ah hunnak a tuah hna lai tiah thawng kan theih.
“Falam in a rak kirlei September 30 zing suimilam 8 hrawng ah hunnak cu a tuah dingin caan suai mi cu a si. Mah ni ah Myo pekmi hunnak a tuah hmasa hnu sianginn hunnak a tuah lai” tiah tuanvo ngeitu Pastor Za Lian Thang nih TCP ah a chim.
Webulah khua mi hna nih khuapi (myo) pekmi le High School sianginn hun lunglawmhnak caah tiin Sia pa li le vok pali thah dingin timhtuahnak zong an ngei tiah theih a si.
Vice President khuallam kong he pehtlai in “September 29 ni Tedim, Rih in Falam ah a riak lai i September 30 (zarhpi ni) zinglei suimilam 8:00 ah Webulah khua myo pekmi lungphun le sianginn hunnak a tuah” tiah Webula khua um tawlrel tu pakhat Micheal nih TCP aha chim.
Webula khua cu rampi Pyi-the-zi zung nih 9-11-2017 (1465/2017) ni ah phungning in khuapi sinank rak pek mi a si. Webula khua cu Falam peng a si i Kalay peng Nat-chaung khua he neih tein a um mi khua a si. Hi khua cu rili in pe (3650) a sannak hmun ah a um mi khua a si i a tu lio ah inn 170, minung 1500 hrawng an um i Khrihfabu pathum Baptist, RCM le Biblical Church of Christ an um tiah theih a si.+++
About The Author
