Washington DC Chin Upa Hna nih Department of State, US Cozah An Ton

TCP-Hakha| 2019 August 5| 2020 chungah US Cozah nih Chin Refugee tam deuh an lak khawh nakhnga Chin Integration and Advocacy Network tawlrelnak in Washington DC Chin upa hna nih US Cozah rian ngeitu hna August 2, 2019 ah an ton hna tiah theih a si.

Hi tonnak kongah “ India ah Chin ralzam 3000 tluk, Malaysia ah 48,000 tluk kan um rih. Malaysia hi Paletwa ral ruangah nikhat ah minung 10-100 kar an phan lengmang rih. A hlan ahcun dawr le company tbk. ah rian an tuan kho nain a tu ahcun riantuan an ngah tilo. Palek nih chun he zan he tlaihkhihnak an tuah hna. Cucaah, aralaimi 2020 ah Chin refugee tampi US nih kan lakpiak kho hna seh tiah US Department zung pathum; US Cozah ruahnak petu Refugee Council Chairman siseh, UNHCR zung siseh, Ramleng lei vuanci chang Refugee tlaitu lubik Richarch Albright siseh, Donald Trump ruahnak pte pa zong kan ton hna. An kan lehning le an kan conglawmh ning kan i lunglawmh ko” tiah ICBC pumhnak ah ICBC Senior Pastor zong a si i CIANUS Adviser Rev. Dr. Hre Kio nih a chim.

Hi kong he pehtlai in July 22, 2019 zongah American Baptist Churches USA General Secretary Emeritus Rev. Dr. Roy Medley, Area Director for South East Asia and Japan Rev. Leslie Turley, and CIANUSA Advocacy Volunteer Zasang Cinzah(2008-2011 tiang Malaysia UNHCR zung riantuan balmi ) hna zong nih Malaysia UNHCR Representative Thomas Albrecht zong an ton tiah theih a si.

Hi ti an tonnak hi President Trump nih October 1, 2019- November 31, 2019 kar ah 2020 tangkakum le Cozah riantuannak chung ah Refugee ralzam auhnak kong he pehtlaimi minsen a thut lai. US Cozah nih Vawlei cung ralzam minung 95,000tluk a lak lai tiah ruahdamh a si. Cu caah Malaysia um Chin ralzam 48,000 tluk le India a um rihmi Chin ralzam 3000 tam deuh hi la colh kho hna seh tiah timhtuah cuahmahmi a si.

Leave a Commnet

%d bloggers like this: