Wetlet Ah SAC Nih Anmah le Anmah Vanlawng In Bom An i Thlak Sual Caah 12 An Thi, GAD le Palek Zung Drone In Bomthlaknak Ah 5 An Thi
The Chinland Post | 2023 June 30 — Sagaing ramṭhen, Wetlet khuachung ah a um mi meithat zung le pyusawhtee inn pawl ah hmunhma a khuar mi SAC ralkap pawl cu SAC kahdohnak vanlawng nih bom thlak a palh sual hna caah SAC chungtel 12 an thi tiah Eagle Guerrilla Force nih cathanh an chuah.
June 29 zinglei sml 9:38mins hrawng ah SAC ralkap kahdohnak Jet vanlawng 1 nih Wetlet khuachung ah a um mi SAC ralkap pawl nih hmunhma an khuarnak meithat zung bom a thlak sual caah SAC ralkap 12 an thi, tampi hliam an tuar tiah theih a si.
Cun zinglei sml 5:54am hrawng ah SAC ralkap, palek le pyusawhtee pawl nih hmunhma an khuarnak palek sakhaan, GAD zung le pyusawhtee hruaitu Tin Htun inn hna cu PDF phu pawl nih Drone in bom lung 22 an thlak i SAC ralbawi 1 telh in 5 an thi tiah an langhter.
Kahdohnak chung ah Eagle Guerrilla Force, Zero Guerrilla Force, Naga Ni phu, Kyaukse pengkomh Drone phu, MRTF Drone Force hna bawm in kahdohnak an tuah tiah theih a si.
