Wetlet peng, Min khua kahdohnak ah PDF 11 an nunnak a liam, SAC ralkap 40 hrawng an thi

The Chinland Post | 2022 July 6 – Sagaing ramṭhen, Watlet peng chungah a cangmi kahdohnak ah PDF minung 11 an nunnak a liam i SAC ralkap lei in 40 hrawng an thi tiah Shwebo peng battalion 15 Tiger King phu nih July 5 ah a thanh.

SAC nih thangzang 150 hrawng in Watlet peng Wetlay khua lei ah July 2 in a kal i battalion 15 nih bom an puah hnawh hna caah SAC ralbawi telh in 2 an thi tiah a langhter.

SAC ralkap pawl cu Wetlay khua in Laykone khua ah an lut i mei an kangh hnu zaan sml 12:00am hrawngah Min khua an lut ṭhan i mei an khangh chap.

July 3 zinglei sml 6 hrawngah Min khua ah hmunhma a khuarmi SAC ralkap pawl nih mei an khangh ṭhan caah Tiger King le a hawikom phu 15 fonh nih zinglei sml 8:30am in chun sml 12:00pm tiang an kah hna. Min khuami 5 telh in mipi hriamtlai pawl a nunnak a liammi an um tiah a langhter.

A nunnak a liammi PDF 11 hi Pidaukchone PDF, Magway ramṭhen phu, Gwaypinkone phu, Lightning phu le Zuathitkone LDF phu hna in an si i Min khuami 5 telh in khuami cheukhat an thah hna caah mipi lei in a nunnak a liammi 20 hrawng an si lai tiah theih a si.

A cunglei langhtermi nihnih chung kahdohnak ah mipi hriamtlai phufonh lei nih sniper le hriamngan kah ruangah SAC ralkap 40 hrawng an thi tiah Tiger King phu nih a langhter.

Watlet hmunhma ah a lutmi SAC ralkap pawl cu Min khua dih in Shingmaka lei ah an kal tiah theih a si.

Na ruahning rak langhter ve.. (Leave a comment)

%d bloggers like this: