WFP bawmhnak Paletwa a phan than, kan thawngpang an theih peng a biapi tuk: Salai Za Uk Ling

TCP Hakha — World Food Program (WFP) tawlrelnak le bawmhnak in Chin ramkulh Paletwa ah ral ruang ah hartongmi hna caah bawmhnak July 21 ah a phan tiah theih a si.

WFP nih cathanh an chuah ning ah, Ralzam hna caah a biapi in a herh bikmi, eidin tirawl, siai tbk. ton 165 tluk Paletwa khuapi ah an phanhpi.

WFP’s Country Director, Stephen Anderson nih “Chin ramkulh in a kan bawmtu le cozah nawlngeitu zapi cung ah kan i lawm taktak. Lam a chia, ral ruang ah tihphannak hmun a si ko nain, zapi a kan bawmhnak thawng in Paletwa ah a biapimi thilri le eidin tbk. tampi kan phanhpi khawh” tiah a chim.

Hi kong ah, Chin Human Rights Organization (CHRO) in Deputy Executy Director Salai Za Uk Ling nih, “WFP bawmhnak hi bantuk a phak khawh caah kan i lawm. Kan thaw a chuak deuh ngai. Kanmah le kanmah kan i siaherhnak le zawnruahnak in kan ti khawh tawk tete thazaang chuah cio in kan i zuan hnawh, Kan i bawmhchanhmi hi ai dawh tukmi a si. Amahbelte, caan sau ca deuh le a hnget deuhmi bawmhnak hi cu thil ti kho a simi bu le cozah hna nih a kan dirpi khawhnak lam kawl le khuakhan hi a biapi tukmi a si ve” tiah The Chinland Post ah a chim.

Za Uk Ling (CHRO) nih 2015 ah Paletwa ralzam a rak ton hna tan.

Ralzaam minung 4000 leng caah, 2020 May thla chung ah facang, chiti, cite, a dangdang tirawl le siai zong WFP nih Paletwa tiang bawmhnak a rak phanhpi bal cang tiah an cathanh ning in kan theih.

2015 thawk in Kawl le AA Ralkap ruang ah buaibainak a thawkmi felfai tein a ngaithlaitu phu CHRO in Za Uk Ling nih cun, “Kanmah lei nih kan si khawh chung in an hna verh le thawngpang cat loin kan pek peng khawh hna kha a biapi tuk hringhran. Cucaah, forhfialnak le chimrelpiaknak (advocacy) tuah peng kho ding dirhmun in kan um khawhnak ding ah thawngpang lak le thanh lei in thazaang kan ilak a herh tuk” tiah Paletwa ah a cangmi thawngpang kong a lenglei ramkip cozah le UN sin ah phanhpi khawh a biapinak pehtlai in a chimchih.

WFP cathanh ning thiam in, kan hnu June thla chung zong ah thla 4 chung eidin awk ah a herhhai dingmi an rak bawmhnak an rak phanhpi khawh bal cang tiah WFP cathanh ning in theih a si.

“Kanmah theng nih kan kutke chuak in kan i bawm lai timi lawng kha i bochan loin fawi tein a kan tuah piak kho tu hna kha kan i bochan thiam hna le kan hman thiam kha a biapi tuk.”

WFP nih Paletwa ah bawmhnak pek ding in an rak kal lio ah, aho tiah hngalhlomi nih Sami le Paletwa khuapi karlak ah an rak kah bal hna tiah theih a si.#

Na ruahning rak langhter ve.. (Leave a comment)

%d bloggers like this: