World Champion Rung Lian Ceu Nih Hakha Zatlang Paih Ah Bual A Co
City Hunter| 2018 February 20| February 19 chun in thawkmi Hakha, Chin Miphun Ni zatlang paih ah World Champion Rung Lian Ceu nih bual a co. Zeitindah a paih hna a tengh hna ning a si timi a teng lio hna hmanthlak zong kan hun taar chih. Cun, Zatlang paih ah tambik a teitu le tambik chang a teitu mi zeidah an si timi zong kan hun langhter chih.
Zatlang paih cu February 19 chun in an thawk i zan suimilam 12:00 in an i pai. Rung Lian Ceu cu zan suimilam 11:30 hrawng ah a chuak i minung 6 a tengh hna hnu ah bual a co beh. Hakha Khuathar pathawng pawl a tengh hna, nikum champion Thawng Tling zong a tei. Tluang Lian Thang belte a chuak manh lo. Rung Lian Ceu nih a tenghmi hna le a tei hna ning zoh tikah fawi tuk in a tei hna. Ngakchia tengh in a tengh hna.
Zatlang paih ah aa paimi zapi hi minung 160 renglo an si. Hi chung ah tambik a teitu cu Hakha Khuathar in Zaw Htun a si, minung 16 a tei hna. A changtu cu Hakha Khuathar thiamthiam in Van Ram Awr a si, minung 15 a tei hna.
Rung Lian Ceu cu bual a co dih bak puak bu in an tinpi tiah kan theih. February 20, zingka suimilam 10:00 in a phuphu paih (group) le zuamcawh paih an thawk than lai. A phuphu paih ding ah Hakha Khuathar sang in Chin Hill club pawl cu an i timcia tuk cang tiah kan theih.
Rung Lian Ceu hi February 20 ah tuah dingmi a phuphu le zuamcawh zong ah amah nih champion a co ko lai tiah mizapi nih an zumh cio dih.
Tuzan aa paihmi kong he pehtlai in Paih tlangtlatu phu in upa pakhat nih, “Tuzan Rung Lian Ceu aa paih hi ka voikhat hmuhnak bak asi. Ka tuk a sum. A thawng taktak si. Hi bak hi Pasaltha, pa thawng, paih thiam cu a si. Ka mang hna ah ka rel. Ngakchia tuah bak in a tuah ko hnga” tiah The Chinland Post ah a chim.
Zatlang paih champion taisawm le laksawng cu February 20 ah an pek te lai. Tutan Laitlang a rak tlawn hi World Paih Championship dirhtu le haotu a simi Pu Ang Cung zong nih a rak zulh tiah kan theih.
Rung Lian Ceu cu Hakha peng, Chuncung khuami Pu Si Hmung le Pi Tum Zing fapa a si. A chuahpi unau pa pathum le nu pahnih an si. Rung Lian Ceu hi 1994 July 3, Chuncung khua ah a chuak. 2006 December 16 kum ah Malaysia a phan. 2007 September 13 ah USA a phan. Atu hi Taxes, Amarillo college pakhat ah Automotive Technology (Auto-Technician Engineering) a kumthumnak a kai liopi a si.
A tungkhaan hi pe 5 le letmah 8 a si i pound 202 a rit. Pumrua tha, pa dawh a si. Amah hi lentecelh phunkhat a simi Lai Paih a thiam taktakmi a si. Paih zong a thiam i a tha zong a thawng.
American a phanh hnu ah atu hi voi 10 aa pai cang i cu chung ah voi 8 bual a co cangmi pasaltha taktak a si. Voi 10 aa paih chung ah voi hnih a sung bal. Cucu, 2014 kum Indianapolis ah tuahmi Chin National Day ah Tial Cung Thang nih a rak tei. Avoi hnihnak cu 2015 kum Indianapolis thiamthiam ah tuahmi Chin National Day ah Kap Tawng nih a rak tei i a sung. Cu ti lo paoh cun Rung Lian Ceu hi aa paih chung vialte sungh timi a ngei rih lo tiah kan theih.
Photo: The Chinland Post
About The Author
