World Cup Aa Thawkning Le Khuaruahhar Thilcang Tuanbia

0

City Hunter| 2018 June 8| Vawleicung ramkip nih zaanglekcelh zuamnak le pumpululh chuih zuamnak lakah thapetu mizapi nih an uar bikmi World Cup cu June 14, Russia ram ah an thawk than cang lai. 1930 kum thawk in kumli voikhat tuahmi World Cup zuamnak cu atu hi avoi 21nak a hung phan cang. World Cup ah champion voi zeizat cio dah an co? World Cup lamthluan ah ahodah, zei ram dah tuanbia tialtu an si? Zeitindah World Cup aa thawkning a si?

World Cup ah Brazil in final voithum a chuih i 2002 champion cotu captain – Cafu

Zuamnak an tuahmi lamthluan vialte ah pumpululh thazaang a thawngmi ram South America pacific le Europe pacific ram nih bual an co lengmang. South America pacific nih voi 9 le Europe pacific nih voi 11 bual (champion) an co.

Aa Thawkning Cang
Vawleicung Pumpululh Phu (FIFA_ Federation of International Football Association) in President a simi France miphun Jules Rimet hruainak in professional zaanglekcelh thiam an i telnak pumpululh chuih zuamnak pi cu 1930 kum i an tuahnak thawk in FIFA- World Cup zuamnak pi cu a hung i thawk. Uruguay ram nih innngeitu dirhmun in 1930 kum in an rak thawkmi World Cup cu 2014 kum Brazil ram zuamnak tiang ahkhan avoi 20nak tiang an tuah cang. South America pacific in Brazil in voi 5, Argentina le Uruguay nih voi 2 veve bual an co cang i Europe pacific in Germany le Italy nih voi 4 veve, England, France le Spain nih voikhat cio bual an co.

Pele hi zuamnak voithum ah Brazil champion a copitu hna zaanglekcelh thiam ngeihchunh a si

A hlawhtling bikmi Brazil hi World Cup zuamnak kip ah World Cup luh zuamnak a awngmi phu pakhat a si bantuk in Brazil i zaanglekcelh bik Pele zong zuamnak puai thum chung ah champion a co balmi zaanglekcelhthiam pakhat a si. 2014 champion Germany phu nih zuamnak lamthluan kip ah goal tambik a sut khotu an si, goal 224 an luhpi khawh. Germany hmaikal hlun Miroslav Klose zong goal 16 in goal tambik a sut khotu a si. Argentina le Germany hi World Cup final ah voithum tiang an i tong bal i Germany nih voihnih le Argentina nih voikhat tiin an i tel.

Pumpak In Tuanbia Tialtu
Cameroon hmaikal Roger Milla hi World Cup zuamnak tuanbia lamthluan ah kum upa bik goal sut khotu a si. Roger Milla hi 1994 kum ah kum 42 a si i Russia lei ah voikhat a goal. Brazil in Pele tu cu 1958 World Cup lio ah kum 17 lawng a si rih, Wales lei ah goal a rak sut i kumno bik goal sut khotu tuanbia thar a rak tial. Germany phu hruaitu hlun Lothar Matthaus hi puai 25 in puai tambik aa celh khotu tuanbia a tial i Itlay hnukhamtu hlun Paolo Maldini hi minute 2217 in world cup ah puai sau bik a chuih khotu tuanbia tialtu a si.

Ram In Tuanbia Tialtu
Brazil le Germany hi World Cup i group chuih ah voi 17 tiang a awngmi phu an si i Scotland tu cu world cup ah voi 8 an lut kho nain group chuih in a tla pengmi (group chuih a lonh kho lomi) phu a si. 2018 World Cup ahcun inntek Russia telh in pumpululh phu ngan pawl tampi an i tel lai nain World Cup ah a minthang ngaimi voi 4 tiang champion a la balmi Italy tu cu world cup luh khawhnak ding chuih zuamnak (qualifying) i an tlak caah tukum World Cup ah an i tel kho lo.

2018 World Cup timetable

2018 Russia Ah World Cup
2018 World Cup zuamnak cu a ralaimi June 14 ah an thawk lai i hunnak ah inntek Russia le Asia Pacific in Saudi Arabia an chuih lai. Atu lio Champion Germany cu group E ah an i tel i Spain cu group B Euro Champion Portugal he group pakhat ah an chuihti lai. France cu group C, Argentina cu Group D, Brazil cu group E le England le Belgium cu group G ah an chuihti lai.

Tukum World cup cu zaanglekcelhtu phu serning le an kehlanning ruang ah tu lio champion Germany nih champion an hmuh than lai tiah an zumh cio hna. Cun, minung thazaang a thawng ngaimi Brazil hi Germany caah a biapi zuamcawhtu phu a si kho tiah media pawl nih an ruahdamh.

World Cup Group Thenmi
Group A: Russia, Saudi Arabia, Egypt, Uruguay
Group B: Portugal, Spain, Morocco, Iran
Group C: France, Australia, Peru, Denmark
Group D: Argentina, Iceland, Croatia, Nigeria
Group E: Brazil, Switzerland, Costa Rica, Serbia
Group F: Germany, Mexico, Sweden, South Korea
Group G: Belgium, Panama, Tunisia, England
Group H: Poland, Senegal, Columbia, Japan

Champion An Co Zat

Brazil voi 5,
Germany voi 4
Italy voi 4
Argentina voi 2
Uruguay voi 2
England voi 1
France voi 1
Spain voi 1

Zumh Bikmi Phu
2018 World Cup ah a chuihtu ding min cazin a chuah hnu ah tu lio champion cotu Germany nih champion an co than lai tiah an zumh cio. 2002 hnu in champion co khawhnak caantha a ngeitu hi Brazil a si, Spain, France zong hi a biapi in zoh dingmi le zumhmi an si ve. Mah zumh bikmi phu 4 pin ah vawleicung zaanglekcelh thiam minthang umnak a simi Argentina, Portugal le England hi tah champion co khawhnak ding caantha an um hmu kho lai maw? The Chinland Post careltu in pumpululh uartu hna nih tah zeitindah nan ruah cio? Ahodah nan zumh cio hna?
Ref: BBC

About The Author

Na ruahning rak langhter ve.. (Leave a comment)

%d bloggers like this: