MFF Aiawh In World Cup Hunnak Puai Kal Ding Ah NC Thawng Tha Thang Aa Tel
JNS Salai_ Yangon| 2018 June 10| Kawlram in Myanmar Football Federation (MFF) nih thlahmi World Cup 2018 hunnak puai zawh dingmi minung 13 lakah GFA FC President NC Thawng Tha Thang aa tel, June 12 ni ah Yangon in an i thawh lai.
MFF President U Zaw Zaw le MFF Secretary U Ko Ko Thein tel in aiawhtu hna cu hunnak puai (openning ceremony) pin ah 14 June ah chuih dingmi Russia le Saudi Arabia puai, 15 June ah chuih dingmi Portugal le Spain puai zong an zohta chih lai. MFF President le Secretary cu avoi 68nak FIFA Congress zong an kai chih lai tiah kan theih.
Hi puai kalding ah MFF tang i a ummi Myamar National League (MNL) committee chungtel cheukhat le MNL ah aa tel khomi Club ngeitu cheukhat thim an si i, NC Thawng Tha Thang cu GFA FC a ngeitu le President sinak in aa tel khawh hi a si.
“Atu tan ah MMF aiawh in FIFA openning ceremony kai ding in thim ka simi hi khuaruahhar thil a si lo. Kaa tel khawhnak cu rampi huap (naitonal level) ah Chin aiawh in club pakhat kan ngeih caah a si” tiah TCP ah a chim.
GFA FC hi Kawlram pumpi huap in Chin miphun aiawhtu pumpululh phu a sinak kong le Chinmi nih Kawlram pumpi huap in hmunhma ngeih a herhnak kong GFA President nih cun a chimchap.
“Chin miphun cu Kawlram chung um miphunpi pakhat kan si ve tik ah rampi huap ah a lamkip in hmunhma kan ngeih khawh hi a biapi tuk. GFA FC zong hi Kawlram pumpi huap Chin miphun aiawh in kan tuahmi a si. Chin miphun chung in miphun dang hmai ah rampi huap hmunhma kan ngeih khawh tik ah pakhat le pakhat kan i dirkamhmi le kan i sunhsak tawnmi hi miphun dang he kan i lawh lonak zawn a si i, thiltha ngai ah ka ruah” tiah GFA President nih cun a chim.
MFF haotu le chungtuan pin ah Russia kalding ah thimmi upa hna cu Zwekapin FC a ngeitu U Hla Hte, Rakhine United FC a ngeitu U Zaw Min Thein, Sagaing FC a ngeitu U Chit Myo Htike, Magwe FC a ngeitu le Asia World Company Chairman U Thein Win, GFA FC President NC Thawng Tha Thang, Shan United FC President U Khun Naung Myint Wai, MFF CEO U Soe Moe Kyaw hna pin ah an rian tlaihmi fiang in theih rih lomi U Min Hlaing, U Ung Kyaw, U Aung Myo Saw le Daw Yin Yin Hla hna an si.
12 June 2018 an i thawh lai i, hunnak puai (opening ceremony) le pumpululh chuih puai hnih an zoh hnu ah 17 June ah Russia in Kawlram an phan than te lai.
About The Author
