Yangon ah NUG nih Ralkap Battalion Thar No. 5101 An Dirh
Salai Mangpau | June 2, 2023 — National Unity Government (NUG) kuttang um Yangon ramthen hriamtlaih cawlcanghnak fak deuh in hmalak ding timhtuahnak he June 1 ah PDF Battalion no. 5101, a thar an dirh tiah theih a si.
SAC ralkap le a bawmchantu dohnak Underground Movement (UG) lawng si tilo in, PDF taktak cawlcangh thawk ding ah in June 1 ni ah Yangon hrambumh a hmasa bik Battalion 5101 cu dirh a si cang tiah NUG nih thawngthanhnak a tuah cu a si.
NUG chimnak nawlngeitu Nay Phone Latt nih, “Battalion 5101 dirhnak a ruang ah atulio khuachung cawlcangmi, Underground Movement (UG) zeihmanh donhkhanhnak a um lai lo, UG zong pehzulh in a um peng ko lai, SAC ralkap nawlngeihnak le uknak a thawnnak khuapi deuh ah mah bantuk Battalion thar kan dirh” tiah a chim.
“Kan ral nih a uk (control) khawh mi khuapi deuh ahhin mipi ralkap (PDF) thawnter ding a herh. Atu ah, Bago, Mandalay, Ayeyawaddy, Yangon ah Battalion thar dirh a si cang. Mah battalion hi a tu dirh hram thawkka a si caah a herhmi timhtuahnak, training peknak, hriamnam kong ah kan buaipi lio i Khuachung kahdohnak cu ni le can nih lai a rel te lai. A bik in Kan ral SAC tei khawh hi a biapi cem ko, SAC ralkap nih Mipi uknak a lak hnu in khuate lei kahdohnak a um. Khuapi chungah raldohnak a fak tuk leng rih lo. Nihin ah Khuachung tiang battalion a hun um cang. Dohthlennak hi a rannak in dih cang seh ti kan duh. Khuachung cawlcanghnak NUG nih Battalion thar a dirh mi ah Dalan pawl fimtawl kho ding lam thar a ser a si ko. Khuachung Dalan fimhlawmnak mission hi palh lo ding hi a biapi nga” tiah NUG chimnak nawlngeitu Nay Pone Latt nih a chimchap.
Battalion 5101 a herh mi thilri cawknak ah “Yangon caah ceunak (ရန်ကုန်အတွက် အလင်းစက်”) timi min in US $500,000 Fundraising cu June 1 ah an thok tiah theih a si.
SAC ralkap nih Uknak hramhram a lak nu ah ramchung ah ah PDF Battalion 300 leng cu peng (Myo) 250 ah dirh a si cang tiah NUG nih a langhter.#
About The Author
