Yangon Golf certual le Mingalardon vanlawng sakhaan hriamngan in kah an tong

0

The Chinland Post | 2022 April 9 – SAC nih a tawlrelnak sipin nih a ngeihmi Yangon khua Golf certual cu April 9 zinglei 6:00am luan hrawngah hriamngan in kah a tong i minung pakhat a hliam, bom in kah an tong tiah thawngtheih a si.

“Golf certual No. 11 ah bom a tla. Golf certual ah rian a ṭuanmi pakhat a khen. A tu cun, ralkap le palik pawl an phan. Certual a chung le leng zohfelnak an ngei. Thil a can hi sml 6:00am luan 7:00am a tlin lai hrawngah a si. Golf certual hi an khar lo” tiah Golf certual in rianngeitu pakhat nih Khit Thit ah a chim.

Yangon Golf certual hi ralkap Golf certual he aa pehmi a si i pension a la cangmi ralkap bawi pawl, zung bawi pawl le ralkap he aa pehtlaimi sipuazi minung pawl an rak tu tawn, bia an i ruahnak hmunhma pakhat a si tiah Yangon khuami hna nih an chim.

Cun, Mingalardon vanlawng sakhaan, minung an ummnak a khan pawl hriamngan in kah a tong i ralkap nih a ngeihmi khoh-suai sehzung pawng a puak tiah khuami hna sin in theih a si tiah Khit Thit nih a langhter.

Hriamngan a puah thawng cu Hmawbi le North Okkalapa lei in kan theih khawh tiah Hmawbi khuami pakhat nih Khit Thit sin ah a chim.

“Zing sml 7:15am ah thawngpang thang taktak in voi 4 a puak”.

North Okkalapa khuami nih “Kan lu ah ṭek nih an kan tlak cang rua tiah kan ruah. Bom puah thawng ka theihmi lak ah a thang bik a si. Zinglei sml 7:00am hrawng ah a puak” tiah Khit Thit ah a chim.

About The Author

Na ruahning rak langhter ve.. (Leave a comment)

%d bloggers like this: