Yangon In Meng 100 Hrawng Aa Hlatnak Ah Kahdohnak A Fak
Salai Mangpau | July 17, 2023 |
Yangon in Meng 100 hrawng a hlatnak Bago ramthen, Nyaunglebin peng, Yangon-Mandalay lamhlun, Taw Wih khua pawng ah SAC ralkap le mipi ralkap PDF hna karlak kahdohnak hi July 14 zaanlei in a hram aa thawk tiah Me Khong News nih a langhter.
“Ping Za Lok le Nyaunglebin lamton, Yangon-Mandalay tlanglawng lam ton umnak Taw Wih khua pawng kahdohnak cu July 14 in tuni (July 17) tiang kahdohnak a um peng rih. Ralhrang lei in hriamngam 120MM an hman ruang ah pawngkam khuami inn a rawk mi an tam ko” tiah khuami sin in theih a si. Atu kahdohnak hmun hi Yangon le Naypyidaw karlak raltuknak hmun rem ngai mi le a biapi ngai mi ralrunvennak hmun mi a si. Kahdohnak ruang ah khuachung mipi cu humhimnak ah an tli/zaam.
A luan cia July 7 zing lei ah Yangon-Mandalay lam ah SAC lutlai bawi nga Lieutenant General Kyaw Swa Linn le a kuttang hna motor rual pawl cu atu kahdohnak hmun hrawng ah mipi ralkap PDF nih bawh in an rak kah bal cang hna.
Photo: Hlaing Info
