Yathettaung Sakhan In A Tli Mi SAC Ralkap Mi 150 Cu AA Nih An Tlaih Hna
The Chinland Post | January 16, 2024 – Yathettaung peng, Yesochaung byuha telh in a pawngkam um sakhan in a tli mi SAC ralkap 200 cu AA nih lam tantim in an rak bawh hna i an kah hna caah a nung in tlaih mi 150 hrawng an si tiah theih a si.
“An dihlak ah ralkap 150 hrawng an si, an tliknak lam a um ti lo caah a sungpe mi, tlaih mi, hriamnam, eidin thilri pawl tampi lak khawh a si tiah AA lei nih an chim.
Yesochung byuha, Amiattaung ralkap sakhan ah hmunla mi SAC ralkap pawl cu January 13 zaan ah Mangintlang sakhan an rak i thial hnu ah Mayu tiva kam lei ah Sehhle-seh in mawngh mi vokkaunglawng in tlik an i timh hi a si.
Tlik an tim mi SAC ralkap cu AA nih karceh in an kah hna caah January 15 zing 6:00 in zanlei tiang an I kap tiah khuami nih an chim.
Mah kahdohnak ah SAC ralkap 40 hrawng an thi tiah pawngkam khuami nih an chim.
SAC ralkap chung in kahdohnak a duh lo i thantar rang tlir in hriamnam a chiah mi caah lam onhnak hal ah cun lam onh piak in tlaih an si lai tiah AA lei nih thawngthanhnak an tuah mi a um.
Kan hnu lei January 12 ni ah Mrauk-U peng Linmuai tlang sakhan kahnak ah SAC ralkap 100 leng an tlik lio ah AA nih lam bawh in an rak kah cang hna.
2023 November 13, Rakhine kahdohnak ah SAC ralkap sakhan 100 leng chuah tak in an rak tli cang, nihin tiang ah sakhan 160 hrawng cu AA nih an lak khawh tiah theih a si.
Rakhine ramkulh le Chinram thlanglei Paletwa peng zong ah AA nih pengkulh dihlak SAC ralkap sakhaan vialte an lak. Rakhine ramkulh Myouk-U, Minpia, Pouktaw, Yanbe khuachung ah kahdohnak a tuah cuahmah lio tiah Delta News Agency sin in theih a si.
