Yes le No Hi Laica in zei kan ti?

Salai Van Biak Thang — ‘Yes’ le ‘No’ hi Laica in zei kan ti tiah biahalnak um sehlaw, ‘si, um, aw’ le ‘si lo, si hlah, um hlah, um lo, ah’ ti phun in kan leh ko hnga. A dik. Hika i ‘um’ timi biafang hi umnak hmunhma si loin ‘eh’ tiah cohlannak kan langhternak i chimmi khi a si.

1. Is your father a pastor?
[Na pa cu pastor a si maw?]
Lehnak: Yes [Si]
2. Is your father at home?
[Na pa inn ah a um maw?]
Lehnak: Yes [Um]

Miphun dang holh hmannak le lehnak kong he pehtlai in naite ka tonmi vun chim ve ka duh. Mirang ca in tialmi ca pakhat ka let. Biahalnak an tuah i cu biahalnak cu ‘Yes’ le ‘No’ thim in leh ding an si. Tahchunhnak kan vun zoh lai:

3. Do you think you need to learn English? Yes/No
[Mirang holh cawn ka herh tiah na ruat maw? Si/Si Lo]

4. Has your child ever had chicken pox? Yes/No
[Na fa nih hmaihu zawtnak a ngei bal maw? Si/Si Lo]

A cunglei No. 3 le No. 4 i ‘Yes’ le ‘No’ lehmi hi sullam an ngei lo. ‘Herh, Herh Hlah’ asiloah ‘Ngei, Ngei Lo’ tiin leh lawngah sullam an ngei. A cung deuh No. 1 le No. 2 i ‘Yes’ le ‘No’ lehmi tu cu sullam ngei a si.

Catialtu Salai Van Biak Thang, CHRO Program Director (Peace, Development and Democratization)

Asinain, tha tein vun zoh than law, vun letthal hmanh. ‘Yes’ le ‘No’ hi Laica i kan leh tikah asiloah Lai nih kan holhning chungah kan van khumh tikah amah dirhmun in sullam a ngei lo. Biatlang kan chimmi Mirang biafang chung i ‘verb’ hnu a zul peng. No. 1 le No. 2 i ‘Yes’ le ‘No’ nihkhin ‘si, um’ timi sullam an ngeih ruangah si loin kan chimmi biatlang chung i biafang ‘si’ le ‘um’ hnu an zulh bia tu a si. An i pehtlaihnak tu nih a hruai deuh hna.

5. Come here. [No]
[Ka hin ra. (Ah, aih)]

6. Come here. [Yes]
[Ka hin ra. (eh, aw)]

A cunglei No. 5 le No. 6 zoh tikah phundang te si hoi. Biatlang i ‘verb’ a zul ti lo. Nain, a biafang in thlir loin a hei sawh duhmi zoh ahcun ‘ah, aih, eh, aw’ nihhin ‘come (ra)’ timi bia khi an hei lehnak a si kha fiang tein lang. ‘Verb’ a zul lo nain pehtlaihnak a ngeih thiam caah then awk tha in an um hoi lo.

Cucaah, ‘Yes’ le ‘No’ nih Laiholh le Laica ah dirhmun asiloah sullam an ngei lo, thli bantuk an si ti khawh a si bantukin sullam tampi an ngei ti khawh zong cu a si men lai. Hika i langhter duh bikmi cu miphun dang holh kha hliah khat lawng zoh in a thiah in thiah sual a fawite. A cheu cu sullam pakhat in leh khawh colh an si nain a cheu cu an si lo. Thuk deuh le kau deuh in lehthal i sullam ngei deuh in kan chuahpi cu a rak hau ko.#

Na ruahning rak langhter ve.. (Leave a comment)

%d bloggers like this: