Zalennak Cu A Man A Faak! (Freedom is Costly!)

0

2020 September 20 — Nun Zalennak hi minung a simi poah nih duh cio mi a si. Zalennak cu kan Pathian nih minung a rak kan ser lio te in aa kan pek cia mi ‘Nuhrin Covo’ a si. Sihmanhsehlaw, kan Chin miphun nih kan rak ngeihmi ‘Nun Zalennak’ cu hramhram in chuh kan sinak hi kum zabu pakhat deng a si cang. 2021 February 1 thawkin kan mipi le mino dihlak nih cu ‘Zalennak’ kan rak ngeihmi cu kan vun hlam ruangmang i laak tthan dingin a phunphun in duhlonak kan langhter. Hi lioah hin kan miphun nih kan philh lo ding mi cu, ‘Nun Zalennak’ hi fawizaang tein hmuh khawh a si lo; a man a fak taktak ti hi kan i fian a hau. Phundang chim ahcun ‘Phu Hlam’ a si caah a man kan pek dingmi tampi lakah thil pathum in vun langhter ka duh.

Caan: Zalennak cu a man a fak. Cu a man a fakmi chungah, sui le ngun zongnih cawk khawh lo mi, ‘Caan’ hi aa tel. Kan Ramkomh Kawlram tuanbia kan zoh tikah ‘Zalennak’ hmuh dingah kan Rampi nih kum 70 chung kan hngah cang, ti khawh a si. A cheu khat kan pu le kan pa le nih cu ‘Zalennak’ cu hmu kho loin an nunnak a liam cang. A tu kan Chinram le Kawlram sining kan zoh tikah, Zalennak hi kum zei maw zat cu “caan” pek in lungdong lo tein kan hngah a hau rih ko lai. Lungsau tein kan hngah lioah kan ngeihmi caan sunglawi hna hi, cu ‘Zalennak’ kan hmuh khawh tthannak ding caah kan pek a hau.

Thisen: Zalennak cu a man a fak. Cu a man cu, “Thisen” hi a si. Ramkomh Kawlram ah ‘Zalennak’ hmuh dingah kan u nau tampi nih an nunnak an pek cang. Atu hrimhrim zongah an pek lio cuahmah pi a si. “Thisen” kan timi cu phundang in chim ahcun ‘Nunnak Pek’ hi a si. Nunnak tampi hna cu raltuknak ah a liam. Khua chungah a liam. Thonginn chungah a liam. Ramri ah a liam. Lam cungah a liam. Ramtang ah a liam. Sihmanhsehlaw, Zalennak timi cu muihnak nih a khuh peng ko rih. Zalennak cu a man a fak tukmi “thisen” asiloah “nunnak” in cawk a si. Nunnak pek loin le thisen luang loin Zalennak taktak hmuh khawh a rak si rua lo. Kan nunnak thap a hau ko.

Pumpek: Zalennak cu a man a fak. Zeicaah tiah kan zeizong vialte a kan huap dih. Zalennak cu ‘sacrifice’ timi kan zeizong vialte pekin cawk a hau mi a si. Pumpeknak um taktak lo ahcun Zalennak taktak hi hmuh khawh dawh a si [rua] lo. Kan ram Zalennak hmuh ding caah aa pumpemi kan tlawm tuk rih ko rua. Kan thisen maw, kan nunnak maw, kan chawva maw, kan caan maw, kan sining in maw, pumpek in cu Zalennak cu cawk a hau. Zalennak cu a man a fak tuk hringhran ko; zeizong vialte pumpek in cawk a hau. Hinak fakdeuh in kan i pumpek chinchin a hau ko.

A cunglei i ka vun langhter bantukin ‘Zalennak’ cu a man a fak. Cucaah, lungsau thinfual in kan “caan” pek in kan hngah a hau rih ko lai. “Caan” timi lawnglawng nih Zalennak cu a cawk khawh. Cun, cu Zalennak cu kan “thisen” le “nunnak” he thlen in kan cawk a hau. Cucaah nang le kei kan nunnak le thisen kan siang hna lai maw? Ram pakhat thlennak dingah cun “policies” le “diplomacy” le “dialogue” timi hna lawngin a rak si lo ti cu vawlei cung tuanbia nih fianh cia kan si. Kan thisen le nunnak pek in cu Zalennak cu kan cawk a hau ko. Cun, cu Zalennak cu zeizong vialte pumpeknak ngeih lawnglawng ah kan hmuh khawh lai. Zalennak caah nang le kei zei bantuk pumpeknak kan tuah cang. Ka nolh rih lai: Zalennak cu kan caan, kan thisen, kan nunnak, le kan pum kan i pek lawnglawng ah kan hmuh khawh dingmi a man a fak taktakmi a si.

Salai Henry Lian

About The Author

Na ruahning rak langhter ve.. (Leave a comment)

%d bloggers like this: