Zarh thum chungah Myanmar rammi 800 Thailand ah tlaih an tong

0

The Chinland Post | 2022 April 23 – Thailand ram chungah phungning loin luh ruangah April 1-22 tiang Myanmar rammi 800 leng tlaih an tong tiah RFA nih April 22 ah a langhter.

Thai palik pawl nih phungning loin a rak lutmi Myanmar rammi pawl cu Tak district ah nifatin in tlaih an si ko nain ramri mi lutchuak cazin cu rianngeitu hna nih fiang tein an thanh lo tiah Mesot khua ah hram a bunhmi JACBA lutlai U Moe Kyo nih a chim.

“April 21 ah minung 46, April 22 ah 10 hi Mesot Tak ah tlaih an si. Mesai le Yanaung zong ah tlaih a tongmi an um rih. Thai Siangpahrang ralkap nih an tlaihmi cazin kha an langhter lo. A hlan nak in an tam deuh lai. Thingyan lio le Thingyan dih hnu ah ramri rianṭuantu pawl nih mi lutchuak cazin ṭha tein an langhter lo”.

Phungning loin A rak lutmi Myanmar rammi 10 cu Tak district Mesot peng, April 22 ah tlaih an si i Thansaungyan peng, April 21 zong ah minung 34 tlaih an si tiah U Moe Kyo nih a chim.

April 21, Chinyaing district ah a ummi riithai sii check nak gate ah Myanmar rammi a phortu mawṭaw cu check an timh lio ah a tli i aa leh caah phungning loin luh aa timmi minung 6 hma he tlaih an rak si. A cheu cu an zaam kho tiah a chim.

Chinyaing district Mephalon check nak gate zong ah mawṭaw pakhat an zumh lo caah an check i phungning loin luh aa tim mi Myanmar rammi 32 le mawṭaw mawngtu 2 cu Thai palik nih an tlaih hna tiah U Moe Kyo nih a chim.

A luancia March thlakhat chungah Thai-Myanmar ramri ah phungning loin luh aa timi Myanmar rammi 1,600 hrawng Thai palik nih an rak tlaih hna tiah RFA sin in theih a si.

About The Author

Na ruahning rak langhter ve.. (Leave a comment)

%d bloggers like this: