Zarhhnih chungah Chin hriamtlai phufonh le SAC ralkap karlak ah kahdohnak voi 10 a chuak, SAC ralkap 70 leng an thi

The Chinland Post | 2022 July 20 – Chin National Front (CNF/CNA) aa telmi Chin hriamtlai phufonh le SAC ralkap cu July 6 thok in thlanglei Laitlang le chaklei Laitlang ah kahdohnak a chuak i a thimi an tam tiah Chin National Front (CNF) nih a thanh.

July 6 ah CDF-Matupi le SAC ralkap karlak ah kahdohnak voihnih a chuak i SAC ralkap 5 an thi. July 7 ah CNA, CDF-Zotung le CDF-Matupi aa telmi Chin hriamtlai phufonh le SAC ralkap karkak ah kahdohnak a chuak i SAC ralkap 2 nak tlawm lo an thi i 6 an i hliam tiah a thanh.

Falam-Hakha lamcung ah July 8-16 tiang Chin hriamtlai phufonh le SAC ralkap karlak ah kahdohnak voi 8 a chuak i SAC ralkap 60 nak tlawm lo an thi, a tlawmbik 17 an i hliam tiah CNF nih a thanh.

Kahdohnak hi Kalay-Falam-Hakha lamcung khuate a simi tlangrawn, Taal, Tlangzaar, Dokthek, Chuncung hna ah a cang i Kalay in ralkap mawṭaw 27 le ralkap 200 hrawng in an raa i Chin hriamtlai phufonh nih an kah hna hi a si.

Kahdohnak chungah Chin hriamtlai phufonh in 2 an nunnak a liam tiah a langhter.

SAC ralkap nih Valung khuami pakhat an thah lengah Taal khuate inn 29, Tlangzaar khua inn 6 le Chuncung khua inn 15 an khangh tak.

Chin hriamtlai phufonh nih July 13 ah Hakha palik sakhaan le SAC ralkap gate an kah hna i SAC ralkap a thimi an tam tiah Chin National Front thawngthanhnak in theih a si.

Na ruahning rak langhter ve.. (Leave a comment)

%d bloggers like this: